Marseille semur við leikmann með nokkur mismunandi fæðingarár

Mbemba er fæddur í Kongó en hjá fyrstu tveimur félagsliðum sínum í Kongó var fæðingarár hans skráð 1988. Mbemba skipti yfir til Anderlecht árið 2011 en þá var skráð fæðingarár hans 1994. Svo fara sögur af því að Mbemba hefur sjálfur sagt við vini sína að hann sé fæddur árið 1990.

Vangaveltur um aldur Mbemba hafa verið á kreiki lengi. CNN greindi fyrst frá því árið 2013 að leikmaðurinn ætti fjóra mismunandi afmælisdaga sem varð til þess að FIFA skoðaði málið nánar. Í rannsókn FIFA kom í ljós aðili innan knattspyrnusambands Kongó skráði fæðingarár Mbemba árið 1991 svo hann gæti spilað á Ólympíuleikunum með Kongó árið 2012

Árið 2015 skipti leikmaðurinn yfir til Newcastle frá Anderlecht en þá voru gerðar rannsóknir á aldri leikmannsins sem þóttu staðfesta að Mbemba væri fæddur árið 1994.

„Það er búið að rannsaka beinin í líkama mínum sem sanna hver aldur minn er. Núna vil ég bara fá að spila fótbolta. Það hefur verið mikið sagt um aldurinn minn en nú hef ég sýnt hver sannleikurinn er,“ sagði Mbemba við breska blaðið Mirror árið 2015.

Mbemba spilaði með Newcastle í þrjú ár áður en hann var seldur til Porto fyrir tæpar 5 milljónir evra árið 2018. Leikmaðurinn var hjá Porto þangað til hann yfirgaf liðið í lok síðasta tímabils eftir að samningur hans rann út.

Eftir að hann skrifaði undir samning hjá Marseille í gær fóru allar þessar sögur aftur af stað og franski rannsóknarblaðamaðurinn Romain Molina birti á Twitter af gömlu nafnspjaldi Mbemba þar sem kemur fram að leikmaðurinn er fæddur árið 1988.

Þrátt fyrir allt þetta er fæðingarár leikmannsins enn þá skráð 1994 á opinberum gögnum hjá FIFA og því vita í raun fáir hvert raunverulegt fæðingarár leikmannsins er. Flestir miðlar greina frá því að Marseille hafi gert samning við 27 ára gamlan leikmann.