Gísli Ægir Ágústsson og kona hans, Anna Vilborg Rúnarsdóttir, ásamt börnum þeirra eiga og reka Vegamót. Þau segjast vera „Kaupmaðurinn á horninu“ með helstu nauðsynjavörum og ef bæjarbúum vantar eitthvað, sem er ekki til í versluninni þá er það pantað einn, tveir og þrír.
„Við erum líka með bátana, þeir senda okkur bara vörulista og við pöntum það inn, tökum saman og skutlum niður í bát. Vinsælustu vörurnar okkar eru ferskvörurnar, mjólkurvörurnar, ávextirnir og grænmetið. Og já, snakk og öl, svo náttúrulega bara veitingastaðurinn, hann er náttúrulega gífurlega vinsæll, „fish & chips“, segir Anna Vilborg.
Anna segir að Vegamót séu líka félagsmiðstöðin í bænum, þar hittist allt fólkið.
„Já, já, þetta er náttúrulega bara hjarta bæjarins, hérna koma allir í gegn nokkrum sinnum á dag.“
Og ef kaupfélagsstjórinn Gísli Ægir er í þannig skapi þá tekur hann upp gítarinn og spilar og syngur fyrir viðskiptavini, hvort sem það er klukkan átta á morgnanna, tvö eftir hádegi eða tíu á kvöldin, hann er alltaf í stuði.
