ASÍ uggandi vegna gervi­verk­töku og „techno-stress“

Þetta kemur fram í umsögn ASÍ um þingsályktunartillögu um fjarvinnustefnu.

Þar segir að sumstaðar hafi fjarvinna leitt til aukinnar gerviverktöku, sem felist í því að launafólk er gert að verktökum í störfum sem það vinnur í reynd sem launafólk í þjónustu atvinnurekanda en er á sama tíma svipt ýmsum kjarasamnings- og lögbundnum réttindum.

„Einnig er ljóst að þó fjarvinna geti stuðlað að betra samræmi vinnu og einkalífs þá getur hún jafnframt haft mikil og neikvæð áhrif á fjölskyldu- og einkalíf launafólks þar sem skil milli vinnu og einkalífs verða óskýr. Rannsókn á vegum Eurofound og ILO er einnig að finna sem sýnir fram á að fjarvinnustarfsmenn vinna lengur og meira en aðrir og aðrar sem fjalla um svokallað „techno-stress“ sem er víst sívaxandi vandamál,“ segir í umsögninni.

Þá segir einnig að ljóst sé að fjarvinna geti falið í sér verulegt rekstrarhagræði, sem hingað til hafi ekki verið skipt milli launafólks og atvinnurekenda.