„Nú er ég meira að skrifa um persónulega hluti“

Dóra Júlía Agnarsdóttir skrifar 1. nóvember 2022 14:00

Gugusar kemur fram á Iceland Airwaves í ár. Alex Snær Welker Pétursson

Ungstirnið Guðlaug Sóley, jafnan þekkt sem Gugusar, er ein af þeim upprennandi íslensku söngkonum sem koma fram á Iceland Airwaves hátíðinni í ár. Gugusar semur tónlistina sína alla sjálf ásamt því að pródúsera og fær innblásturinn víða. Blaðamaður hitti hana í kaffi og tók á henni púlsinn.

Aðspurð segist Gugusar ótrúlega spennt fyrir Airwaves.

„Ég hlakka mjög mikið til en ég er líka smá stressuð, þetta er svolítið stórt og mikilvægt gigg, en ég er aðallega bara rosalega spennt.“

Hoppar til að hita upp

Tónlistarfólk undirbýr sig á ólíkan hátt fyrir sviðið en Gugusar er með einstaka rútínu:

„Alltaf fyrir gigg þá reyni ég að hoppa smá og geri upphitun, ekki radd upphitun heldur svona líkamlega. Svona rétt fyrir gigg er ég samt búin að naga neglurnar næstum af, það bara fylgir þessu bara held ég,“ segir hún hlæjandi og bætir við:

„Ég hlusta svo alltaf á allt settið mitt á meðan ég er að mála mig og klæða mig og gera mig tilbúna fyrir gigg. Þá er ég bara með heyrnartólin, hlusta í gegn og ímynda mér hvað ég ætla að gera á sviðinu.“

Dansrútínur Gugusar hafa vakið mikla athygli þegar hún er á sviði.

„Ég er með eitthvað planað, í einhverjum lögum er ég búin að semja dans en svo er ég líka að vinna með spuna.

Yngri árin mótandi

Það er margt sem veitir Gugusar innblástur og í tónlistinni er það aðallega hljómsveitin Injury Reserve.

„Þegar það kemur að sviðsframkomu þá myndi ég segja kannski Sia. Hún var alltaf með dansara sem voru að dansa skrýtna dansa. Ég fattaði þetta bara um daginn, ég elskaði þetta þegar ég var yngri og nú er ég að gera svona smá svipað.

Flæði og persónulegri textar

Eins og áður segir semur Gugusar lögin sín sjálf frá A til Ö. Hugmyndirnar koma til hennar á fjölbreyttan hátt.

„Ef ég sest niður og er bara: „Ég ætla að búa til lag sem á að hljóma svona“ þá gengur það yfirleitt ekki. Ég þarf að vera inni í stúdíóinu að leika mér í rauninni, byrja með einhver demó og svo vinn ég lengra og lengra með þau.

Ég átti rosa erfitt með texta þegar ég var yngri en nú er ég komin með meiri áhuga á textum og þeir ganga mikið betur. Textarnir koma betur núna. Ég hafði engan áhuga á textanum þegar ég var að byrja að semja tónlist, ég skrifaði eiginlega bara um eitthvað.

Keppnis skautakona

Gugusar byrjaði að æfa skauta þriggja ára gömul og keppti á ýmsum mótum. Hún segist geta rakið áhuga sinn á tónlist til skautanna.

„Maður keppir alltaf við tónlist í bakgrunn og ég fór að klippa tónlistina sjálf við minn dans á skautum. Svo einhvern veginn færðist áhuginn meira yfir í tónlistina sjálfa frekar en á skautum.

Líka hvað varðar framkomuna, ég var alltaf ein að keppa á skautum við tónlist fyrir framan fólk,“ segir Gugusar að lokum.

Airwaves Tónlist Menning

Tengdar fréttir

Ómetanlegt að hafa alltaf fengið pláss til að prófa sig áfram

Tónlistarkonan Una Torfa kemur fram á Iceland Airwaves í ár en þetta er bæði í fyrsta skipti sem hún kemur fram á hátíðinni sem og fer á hátíðina yfir höfuð. Una Torfa hefur endalausan áhuga á tengslum og leggur upp úr list sem er tilfinningaþrungin og heiðarleg.

31. október 2022 12:31

Burstar alltaf tennurnar rétt áður en hún stígur á svið

KUSK er listamannsnafn tónlistarkonunnar Kolbrúnar Óskarsdóttur en hún skaust upp á stjörnuhimininn fyrr á árinu þegar hún bar sigur úr býtum í Músíktilraunum. KUSK kemur fram á Airwaves í ár en hún var jafnframt að senda frá sér plötuna Skvaldur í dag. Blaðamaður tók púlsinn á KUSK.

28. október 2022 10:01

Tók sitt fyrsta gigg fyrir ári síðan en hefur nú spilað um allan heim

Tónlistarkonan Árný Margrét á viðburðaríkt ár að baki sér en hún spilaði sitt fyrsta gigg á Airwaves hátíðinni í fyrra í gegnum streymi. Þá hafði hún einungis gefið út eitt lag en hefur nú sent frá sér plötu í fullri lengd og komið fram bæði hérlendis og erlendis. Blaðamaður tók púlsinn á Árnýju, sem spilar á Iceland Airwaves í ár.

27. október 2022 08:00

„Þegar ég byrjaði að brjóta reglur þá fór ég að upplifa lífið á skemmtilegri hátt“

Tónlistarkonan Laufey Lín hefur náð gríðarlegum árangri á undanförnum árum úti í hinum stóra heimi. Blaðamaður hitti Laufeyju í kaffi og spjall um lífið og listina en hún er á miðju tónleikaferðalagi um þessar mundir.

26. október 2022 06:01

Erfitt en mikilvægt að taka athugasemdum ekki persónulega

Tónlistarkonan Guðlaug Sóley, þekkt undir listamannsnafni sínu Gugusar, skaust upp á stjörnuhimininn fyrir skömmu síðan og hefur spilað víðs vegar um landið. Gugusar elskar beyglur, umkringir sig góðu fólki og endar eiginlega alla daga í stúdíóinu sínu að semja tónlist. Gugusar er viðmælandi vikunnar í Innblæstrinum.

13. ágúst 2022 11:30