Hvorki harð­ýðgi né svelti á bænum í Borgar­firði

Mikið hefur verið fjallað um meint dýraníð á bóndabæ í Borgarfirði. Þrettán hross voru aflífuð vegna alvarlegs ástands þeirra í október og sauðfé var fjarlægt þaðan í síðustu viku. Matvælastofnun hefur legið undir harðri gagnrýni vegna málsins og var jafnvel stofnaður Facebook-viðburður þar sem fólk lýsti yfir hug á að fara að bænum til að bjarga dýrunum þar nýlega.

Vörslusvipting á um 150 nautgripum á bænum fóru fram um hádegi á laugardag. Dýrin fóru þá yfir á ábyrgð Matvælastofnunar. Á mánudag hófst vinna við að ráðstafa nautgripunum.

Sigurborg Daðadóttir, yfirdýralæknir Matvælastofnunar, segir í samtali við Vísi að bæði stofnunin og bóndinn hafi ráðstafað dýrunum að mestu til lífs. Nánast öllum kúm og kvígum hafi verið komið fyrir annars staðar en rúmlega fjörutíu naut voru send í slátrun.

„Naut eru alin til slátrunar þannig að þetta er bara eðlilegur farvegur,“ segir Sigurborg.

Geyst farið á samfélagsmiðlum

Mildari leiðir, eins og dagsektir, stjórnvaldssektir og að láta vinna verk á kostnað eiganda, hafi verið reyndar en án árangurs. Á endanum hafi eigandinn verið sviptur forræði yfir dýrunum.

„Þetta er síðasta úrræði sem við höfum til að stoppa svona dýrahald þegar sýnt þykir að það er fullreynt að bæta úr. Þá er þetta eina úrræðið sem eftir er,“ segir Sigurborg.

Hún tekur þó sérstaklega fram að að hvorki hafi verið um harðýðgi né svelti að ræða.

„Hér er á ferðinni almennt umhirðuleysi eins og til dæmis vanfóðrun og umhyggjuleysi. Dýrin hafa ekki fengið að njóta þess aðbúnaðar og réttindi sem þeim er tryggður með löggjöf. Þetta eru svona margítrekuð brot á lögum og reglugerðum,“ segir hún.

Aðfinnslur hafi verið gerðar við fóðrun sem var ekki talin nægjanleg.

„En það var langt því frá að þau væru að svelta,“ segi yfirdýralæknirinn.

Sigurborg sigur að umræða um málið á samfélagsmiðlum hafi farið ansi geyst með fullyrðingum sem ekki séu réttar.

„Það er mjög leiðinlegt að allir einhvern veginn bara trúa öllu sem sagt er,“ segir hún og vísar sérstaklega til fullyrðinga um að dýrin hafi verið að svelta.

Mál á þriðja tugs hrossa enn í ferli

Á bænum eru enn í kringum tuttugu og fimm hross en Matvælastofnun er með mál þeirra í vinnslu. Stofnunin hefur gert kröfu um úrbætur og beitt þvingunum til að þess að ná þeim fram.

„Við erum að beita dagsektum, láta vinna verk á kostnað eiganda. Það er í gangi núna. Síðan ef allt um þrýtur endar það með því sem lögin segja að við eigum að gera og geta gert, það er að taka dýr úr vörslu eiganda,“ segir Sigurborg.