Þakkar Seinni bylgjunni fyrir - ,,Ekki gerst síðan út á Nesi árið 2003”

,,Ég er rosalega ánægður með sigurinn. Þetta eru mjög mikilvæg stig fyrir okkur,” sagði Ragnar eftir leik. 

Ragnar hrósaði HK-liðinu og fannst þeirra frammistaða flott. ,,Þær voru drullugóðar í þessum leik. Það varð ekkert slit á milli liðanna fyrr en sá fáheyrði atburður gerðist að ég skipti í 6-0 vörn. Ég þakka Seinni Bylgjunni fyrir það. Ég las í vikunni allar helstu heimildir um það hvenær á að taka leikhlé, hvernig á að taka leikhlé og hvaða ákvarðanir maður á að taka í leikhléi.” 

,,Ég þakka Seinni Bylgjunni fyrir það.” Ragnar var þarna að vísa í umræðu úr Seinni Bylgjunni í vikunni þar sem hann var sérstaklega tekinn fyrir.

Gerðist líka margt í vikunni

,,Gagnrýni er góð og þessi gagnrýni átti að mörgu leyti rétt á sér, þó ég hafi verið búinn að útskýra af hverju ég gerði þetta. Fólk verður svo bara að vera ósammála þjálfunaraðferðunum og sálfræðinni sem verið er að vinna með. Seinni Bylgjan á mikið í því, að ég skipti yfir í 6-0. Það hefur ekki gerst síðan út á Nesi árið 2003. Þá skipti ég yfir úr 3-2-1 yfir í 6-0. Viljandi sko. Það lokaði leiknum fyrir okkur í dag. Við fengum markvörslu á bak við 6-0 vörnina og meiri umsetningu. Okkur tókst að flýta lokaákvörðuninni hjá HK. Ég er rosalega ánægður.”

,,Maður þrífst af því að fá gagnrýni en svo gerðist líka margt í vikunni. Aron Kristjánsson og Díana Guðjónsdóttur tóku liðið í sóknarklíník. Mér fannst það sjást. Það sem þau gerðu á einum og hálfum tima sem við tókum aukalega í vikunni - það gekk rosalega vel upp. Í fyrsta sinn á þessu tímabili erum við með minna en tíu bolta tapaða.” 

Aron hefur stýrt karlaliði Hauka til fjölmargra titla, hann hefur þjálfað íslenska landsliðið og einnig erlendis. Hvernig er að fá hann inn á æfingar? 

,,Það var rosalega vel heppnað og sýnir líka samstöðuna í Haukafjölskyldunni. Við tölum samam; gagnrýnum hvort annað og tökum mark á því - vinnum út frá því. Það er æðislegt í þjálfun að fá inn fólk sem er betra en maður sjálfur á einhverju sviði. Það er eiginlega það besta sem kemur fyrir. Ég verð að viðurkenna að það er fullt af fólki sem er betra í ákveðnum greinum handboltans en ég. Það er bara allt í lagi.”

Ef liðið trúir, þá er það hægt

Ragnar var virkilega ánægður með liðið sóknarlega og varnarlega í dag, en það er alltaf hægt að gera enn betur. 

,,Ég er rosalega ánægður með liðið, en ég er líka mikill fullkomnunarsinni. Ég vill alltaf fara með þetta lengra og gera enn betur. Ég get verið svolítið leiðinlegur svoleiðis og þrjóskur líka. Ég er að vinna í því, það er það sem ég er að gera.” 

Haukar eru núna með fjögur stig og fjarlægjast aðeins fallsvæðið. ,,Við erum í þessari baráttu núna frá fimm til átta. Við eigum Val næst sem verður fróðlegt fyrir okkur því við vorum gjörsamlega niðurlægðar í síðasta leik gegn þeim. Það er mikið að gera og mjög verðmætir leik framundan.” 

Valur er enn taplaust í deildinni. Verða Haukar fyrsta liðið til að vinna þær? 

,,Ef liðið trúir því, þá er það hægt. Ég trúi á þær.”