Liðin byrjuðu á að skiptast á mörkum en um miðjan fyrri hálfleik fór Kadetten Schaffhausen að sigla fram úr og komst fjórum mörkum yfir. Staðan í hálfleik var 14-18 Kadetten Schaffhausen í vil. St. Gallen minnkaði forskot Kadetten Schaffhausen minnst niður í tvö mörk en nær komst St. Gallen ekki og sigurinn var aldrei í hættu. Kadetten Schaffhausen vann að lokum fimm marka sigur 27-32.
Óðinn Þór Ríkharðsson, leikmaður Kadetten Schaffhausen, fór venju samkvæmt á kostum og skoraði ellefu mörk. Það verður erfitt fyrir Guðmund Guðmundsson, landsliðsþjálfara Íslands í handbolta, að líta framhjá Óðni Þór Ríkharðssyni þegar hann velur tuttugu manna leikmannahóp sem fer á HM í janúar.
Kadetten Schaffhausen á einn leik eftir í deildinni þar til gert verður hlé vegna heimsmeistaramótsins í handbolta sem hefst í janúar. Kadetten Schaffhausen mætir Pfadi Winterthur þann 22. desember næst komandi.
