Fé­lags­menn VR sam­þykktu kjara­samninga við SA og FA

Kjarasamningur VR við SA var samþykktur með ríflega 7.800 atkvæðum, 81,91 prósent, en rúmlega fimmtán hundruð greiddu atkvæði gegn samningum. Alls greiddu 9.523 atkvæði og var kjörsókn því 24,37 prósent. 

Hvað samning VR við FA varðar var samningurinn samþykktur með 85,17 prósent atkvæða en 247 greiddu atkvæði með samningnum og 38 sögðu nei. Alls greiddu 290 atkvæði og kjörsókn því 30,88 prósent. 

Félagsmenn VR eru alls ríflega 39 þúsund talsins.

VR, Landssamband íslenskra verslunarmanna og samflot tækni- og iðnaðarmanna skrifuðu undir kjarasamning við Samtök atvinnulífsins þann tólfta desember og síðar sama dag skrifuðu VR og LÍV undir samninga við Félag atvinnurekenda. 

Kjarasamningarnir, sem eru í meginatriðum samhljóða, eru til fimmtán mánaða eða frá fyrsta nóvember 2022 til 31. janúar 2023. Þeir fela í sér 6,75 prósent almenna launahækkun, að hámarki 66 þúsund krónur á mánuði. 

Í viðtali eftir að samningarnir voru undirritaðir sagðist Ragnar Þór Ingólfsson, formaður VR, ekki geta mælt með þeim né á móti. Aðstæður til samninga hafa verið erfiðar og lengra hafi ekki verið komist í viðræðunum. 

„Ég mun ekki mæla gegn þeim og ég mun heldur ekkert mæla sérstaklega með þeim. Ég held að fólk sé bara það upplýst að það geti tekið ákvörðun um það sjálft en ég held að fólk trúi því að við reyndum það sem við gátum. Við augljóslega vildum fá meira í gegn en þetta var niðurstaðan.“

Ellefu prósenta hækkun að meðaltali

Líkt og Vísir greindi frá í síðustu viku fá félagsmenn VR á taxta að meðaltali ellefu prósenta hækkun á launum sínum frá því sem var í apríl, samkvæmt nýjustu kjarasamningunum. 

Mesta hækkunin er hjá þeim starfsmönnum sem hafa unnið lengur en fimm ár hjá fyrirtæki sínu, allt að þrettán prósent, en lægsta hækkunin er í byrjunarlaunum hjá afgreiðslufólki og sérþjálfuðu afgreiðslufólki í verslunum, um 9,7 prósent.

Desemberuppbótin hækkar úr 98 þúsund krónur í 103 þúsund krónur og orlofsuppbót úr 53 þúsund krónum í 56 þúsund krónur. Þá er hagvaxtarauka, sem hefði átt að koma til greiðslu fyrsta maí 2023, flýtt og hann greiddur út strax. 

Starfsgreinasambandið komið með samninga

Atkvæðagreiðslu um kjarasamninga Starfsgreinasambandsins við Samtök atvinnulífsins, sem undirritaður var þriðja desember, lauk á mánudag en yfirgnæfandi meirihluti hjá sautján af nítján félögum samþykktu samninginn. Hjá fimmtán félögum var samningurinn samþykktur með yfir áttatíu prósent atkvæða.

Alls greiddu tæplega 86 prósent atkvæði með samningnum en að aðeins tæp sautján prósent af þeim tæplega 24 þúsund sem voru á kjörskrá greiddu atkvæði. Um 72 þúsund félagsmenn eru í aðildarfélögum Starfsgreinasambandsins.

„Þessi niðurstaða í ljósi alls þessa er alveg ótrúleg í mínum huga og staðfestir það sem við vorum algjörlega sannfærð um. Þetta er ótrúlega góður kjarasamningur,“ sagði Vilhjálmur Birgisson, formaður SGS og Verkalýðsfélags Akraness, eftir að samningarnir voru samþykktir.

Efling stendur eftir

Þriðja stærsta félagið á eftir Starfsgreinasambandinu og VR er Efling en samkvæmt félagatali ársin 2021 var meðalfjöldi félagsmanna 26 þúsund talsins. Samninganefnd Eflingar fundaði í fyrsta sinn með Samtökum atvinnulífsins undir stjórn ríkissáttasemjara í síðustu viku og fer annar fundur fram á morgun.

Sólveig Anna Jónsdóttir formaður Eflingar sagði eftir fundinn í síðustu viku að hennar fólk væri til í aðgerðir náist ekki samningar um kröfur félagsins. Var hún fullviss um að þau myndu ná fram meiru en í öðrum samningum en taldi ekki miklar líkur á að samningar myndu nást fyrir jól.

„Ekki nema einhver stórkostlegur árangur náist þá. Samtök atvinnulífsins fallist á röksemdarfærslu okkar um að okkur hentar ekki samningurinn sem gerður hefur verið við Starfsgreinasambandið. Við þurfum að fá betri samning, við þurfum meiri hækkanir,“ sagði Sólveig.