„Mætti halda að þjálfara­t­eymið hafi verið í brandara­keppni á bekknum“

„Þetta var einhver leiðinlegasti leikur sem ég hef farið á,“ sagði Arnar Daði eftir tap Íslands í gær. Hann fór svo stuttlega yfir það hvernig leikurinn leit út frá hans bæjardyrum séð og óhætt er að segja að Arnar hafi ekki haldið aftur að sér.

„Þetta var náttúrulega bara gjörsamt gjaldþrot frá fyrstu mínútu. Það er einhver smá kafli í fyrri hálfleik þar sem Viggó stelur boltanum, fær síðan einn ruðning varnarlega og Viktor Gísli ver sína tvo bolta í leiknum og þá snýst leikurinn við.“

„Við þurfum að fara að hætta að tala þessa kalla upp í öðrum þjóðum eins og þeir séu eitthvað frábærir. Við erum bara sjálfum okkur verstir í þessum leik. Við klikkum á einhverjum tíu dauðafærum. Varnarlega erum við ömurlegir og markvarslan er engin.“

„Það skiptir ekki máli hvort þú sért að keppa á móti Ungverjalandi, Portúgal, Grænhöfðaeyjum eða Svíþjóð. Þegar frammistaða lykilmanna, bæði varnar- og sóknarlega og líka markmanna, er ekki betri en þetta þá skiptir ekki máli á móti hverjum þú ert að keppa.“

Ekkert ofmat

Þá segist Arnar ekki hlusta á þá sem segja að hann og aðrir Íslendingar hafi ofmetið liðið fyrir mót.

„Mér skilst að Dagur Sigurðsson hafi verið að tala um í HM-stofunni eitthvað ofmat fyrir mót og eitthvað svona kjaftæði. Þetta er bara bull. Við erum með leikmenn á heimsmælikvarða í nánast hverri einustu stöðu, en lykilmenn á þessu móti hafa bara alls ekki hitt á sitt rétta mót. Þar liggur náttúrulega bara vandinn. Og svo er leikstjórnin á bekknum jaðrar bara við að vera lögreglumál.“

Mótið tapaðist ekki í gær

Styrmir Sigurðsson, sem stjórnaði þætti gærkvöldsins í fjarveru Arnars, bendir einnig á að það sem hafi orðið íslenska liðinu að falli á þessu heimsmeistaramóti hafi ekki verið tapið gegn Svíum í gær, heldur að hafa tapað gegn Ungverjum fyrir viku síðan. Arnar var sammála kollega sínum í þeim málum.

„Við getum alveg talað um það og maður hugsaði þetta í hálfleik af því að maður sá alveg í hvað stefndi. Þetta var ekkert eðlilega erfitt og við þurftum að hafa ekkert eðlilega mikið fyrir öllum helvítis mörkunum okkar. Við vorum kannski í sókn í 45-50 sekúndur og svo keyra þeir á okkur í hraða miðju og við fáum mark í bakið.“

Fá svör við sænsku vörninni

Arnar minnist einnig á það að sænska liðið hafi mætt því íslenska ofarlega í sínum varnarleik sem hafi gert íslensku sóknarmönnunum erfitt fyrir. Hins vegar hafi vantað svör frá íslenska liðinu til að tækla þessa framliggjandi vörn Svía.

„Ástæðan fyrir því að við þurfum að stinga niður er náttúrulega bara sú að Svíarnir mæta okkur frekar ofarlega þannig við getum ekki mætt boltanum á ferðinni. Bæði Ómar og Viggó hægra megin og Janus og Gísli Þorgeir á miðjunni þurfa að fá boltann frekar aftarlega og þá þurfa þeir að reyna að koma sér á ferðina með drippli.“

„Þarna hefði maður sem þjálfari ekkert endilega verið óhress ef hornamennirnir myndu bara taka blindar innleysingar bara til að fa Svíana til að detta aðeins niður. Ég held að Óðinn hafi gert það einu sinni í fyrri hálfleik og við fengum mark úr því. Ekkert endilega frá honum, en þá kom smá talningavilla frá Svíunum.“

„En heilt yfir í sextíu mínútur geta Svíarnir bara spilað sína vörn. Þeir mæta Gísla Þorgeiri bara á 10-11 metrum og hann vinnur kannski tíu prósent af sínum árásum og þá er hann kannski ekki einu sinni kominn í gegn því hann er enn þá á 7-8 metrum.“

„Þetta er ekkert eðlilega einhæft og við tökum held ég þrjár hornainnleysingar í leiknum og skorum held ég eftir allar þeirra.“

„Eins og menn þori ekki að taka erfiðar ákvarðanir“

Margir af þeim sem fylgdust með leiknum furðuðu sig á því að Kristján Örn Kristjánsson, Donni, hafi ekki fengið fleiri mínútur í leiknum. Donni átti góða innkomu í síðari hálfleik, en var fljótt tekinn af velli áður en hann kom aftur inn á undir lok leiks.

„Donni kallinn, hann gerði greinilega ekki nóg til að fá að spila meira. Þetta er náttúrulega bara algjört grín.“

„Það mætti halda að þjálfarateymið hafi bara verið í einhverri brandarakeppni á bekknum. Það var bara hver ætti næsta brandara. Það er eins og menn séu bara heiladauðir á bekknum. Þannig er staðan.“

„Vissulega kemur Viggó aftur inn á þegar við erum í yfirtölu og maður skilur það alveg að þeir ætli að treysta honum í yfirtölunni, en hvað svo? Það er sama með Sigvalda sem var ískaldur og klikkar á þremur skotum. Óðinn fær tveggja mínútna brottvísun og Sigvaldi skorar á meðan hann er út af, en svo á Óðinn auðvitað bara að koma aftur inn á. Það er eins og menn þori ekki að taka erfiðar ákvarðanir sem að mínu skapi eru ekki einu sinni erfiðar ákvarðanir. Þetta eru bara eðlilegar ákvarðanir.“

Lykilmenn ekki til taks þegar á reyndi

Þeir félagar ræddu einnig um þá lykilmenn liðsins sem gátu ekki verið með íslenska liðinu í leik gærdagsins vegna meiðsla. Aron Pálmarsson var ekki í leikmannahóp Íslands og Ómar Ingi Magnússon fór meiddur af velli í fyrri hálfleik.

„Það er líka enn einn brandarinn í ákvarðanatöku Guðmundar Guðmundssonar. Hvernig dettur manninum í hug að láta Ómar spila tvisvar sinnum sextíu mínútur í fyrstu tveimur leikjunum með það að markmiði að ætla að reyna að komast í átta liða úrslit? Við hverju bjóst maðurinn?“

„Maðurinn veit það manna best sjálfur á eftir Ómari hvernig staðan er á leikmanninum og hann ætlar að keyra á Ómari Inga í sextíu mínútur þegar hann getur ekki einu sinni æft tveimur til þremur dögum eftir leik með Magdeburg. Og hann spilar ekki einu sinni sextíu mínútur þar. Kay Smits spila 15-20 mínútur með Magdeburg í hverjum einasta leik.“

Arnar og Styrmir héldu svo áfram að ræða um frammistöðu Íslands á heimsmeistaramótinu í handbolta, en umræðuna má heyra í nýjasta þætti Handkastsins í spilaranum hér fyrir neðan. Umræðan hefst eftur um níu mínútur.