Vind­myllu­veri í Klaustur­sels­heiði mót­mælt

Að sögn Auðar Önnu Magnúsdóttur, framkvæmdastjóra Landverndar, miðar söfnuninni ágætlega.

„Við erum að gera þetta af litlum efnum og dreifum organískt. En þetta potast. Í fyrra vorum við með tvær undirskriftasafnanir þar sem við fengum tvö þúsund í annarri og þrjú þúsund í hinni. Þetta er komið yfir fimmtán hundruð undirskriftir núna,“ segir Auður og metur það svo í samanburði að áhugi fólks á þessu sé verulegur.

Á vef Landverndar er ekki gert lítið úr áhrifum þessarar framkvæmdar, nema síður sé. Þar segir meðal annars að hvert mastur yrði allt að 250 metrar að hæð og hver spaði allt að 80 metrar að lengd. 

„Framkvæmdasvæðið yrði á stærð við hálft Þingvallavatn eða jafn stórt og 5.756 fótboltavellir lagðir saman.“ Þá segir að sjónmengun vindorkuversins næði yfir miklu stærra svæði því mannvirkin myndu sjást vel víða úr Vatnajökulsþjóðgarði og öllum heiðum og fjöllum í nágrenninu.

„Við hvert mastur þarf 1.200 fm mikið styrktan pall undir krana sem notaðir eru til að koma möstrunum á sinn stað og undir hvert mastur þarf auk þess 120 fm öfluga undirstöðu.“

Ríkisstjórnin dregur lappirnar um að setja reglur

Fyrirhugað er að söfnunin, sem fór af stað 19. þessa mánaðarstandi til mánaðarmóta febrúar/mars.

„Þá munum við loka á og skila undirskriftunum til sveitarfélaganna eða Múlaþings og svo Zephyr AS.“ segir Auður.

Spurð hverjar hún meti líkurnar á því að þetta verði segir Auður að það fari að verulegu leyti eftir því hvernig stjórnvöld bregðast við.

„Ríkisstjórnin hefur dregið lappirnar í að taka af allan vafa um að þetta heyri undir lög um rammaáætlun. Formlega séð heitir þetta lög um vernd og orkunýtingu landsvæða, 48/2011.“

Guðlaugur Þór vill að nærumhverfið njóti gróðans

Guðlaugur Þór Þórðarson umhverfisráðherra kom með útspil sem þessu tengist á RÚV í morgun þegar hann sagði að hann vilji að tekjur af vindorku renni til nærumhverfis. Ekki skal efast um að þessi málflutningur fellur í kramið heima í héraði. Auður segir það ekki óeðlilegt ef verið er að reisa orkuver sem valdi íbúum í nágrenni óþægindum og jafnvel skaða.

„Að þeim sé bættur sá skaði sem þeir verða fyrir. En það verða að vera ríkir almannahagsmunir fyrir því að slíkt sé reist. Og við höfum náttúrlega ekki séð að þeir séu fyrir hendi þarna og ekki í orkuframleiðslu þegar 80 prósent rafmagnsins fer til stórnotenda, 70 til álveranna og kísilverananna. Erfitt að sjá að viðbót við raforkukerfið séu brýnir almannahagsmunir.“

Og Auður bendir á að ef það eru miklir fjárhagslegir hagsmunir í húfi fyrir þá sem taka ákvörðun um leyfisveitingar þá erum við náttúrlega komin með stöðu þar sem leyfisveitandi getur ekki talist vera hlutlaus.

Á vef Landverndar kemur fram að vindorkuverið Klausturselsvirkjun á Fljótsdalsheiði sé áætlað allt að 500 MW sem myndi gera það að næststærstu virkjun landsins.

„Gert er ráð fyrir 70 -100 risamöstrum sem hefðu í för með sér gríðarlega eyðileggingu á landslagi og víðernum, óafturkræft jarðrask og eyðingu votlendissvæða.

Af orkuverinu hlytist mengun, truflun og ógn við gróður, fugla og spendýr á svæðinu, m.a. hreindýr, himbrima, álftir og gæsir.

Þeir sem vilja njóta svæðisins yrðu óhjákvæmilega fyrir truflun og óþægindum.“

Alli í Klausturseli segir enga sjónmengun af vindmyllunum

Býlið Klaustursel er í Jökuldal Efri, austan Jöklu, en hinn þekkti ferðamannastaður Stuðlagil er í landi Klaustursels og Grundar sem er norðan Jöklu. Aðalsteinn Jónsson fyrrverandi bóndi á Klausturseli, jafnan kallaður Alli í Klausturseli þar eystra þó hann hafi látið af búskap, er hins vegar áfram um að af þessum framkvæmdum verði. 

Hann hefur talað fyrir ágæti vindorku á sinni Facebook-síðu, sem hann kallar sveitasímann – nauðsyn rafmagns í nútíma samfélag; það þurfi að brjóta egg í ommilettuna.

Þann 6. desember bendir hann til að mynda á að ein best heppnaða uppbygging ferðaþjónustu fyrir austan sé Óbyggðasetrið á Egilsstöðum í Fljótsdal og virðast raflínur sem tengjast Kárahnjúkavirkjun ekki spilla upplifun gesta.

„Nú eru í vinnslu áætlanir um virkjun vindorku á Fljótsdals og Klausturselsheiði. Nú háttar svo til að bæði Fljótsdalur og Jökuldalur eru með bröttum fjallshlíðum og tæpir 25 km milli bæja. Heiðin í svipaðri hæð frá fjallsbrúnum að miðri heiði. Því ekki hætta á að sjónmengunar gæti í byggð af slíkri raforkuframleiðslu. Gestir Óbyggðaseturs og Stuðlagils eiga ekki að verða fyrir sjónmengun af völdum slíkrar uppbyggingar,“ segir Aðalsteinn meðal annars.