„Maður skilur tónlistina aldrei til fulls“

„Ég er með herferð í gangi á Karolina Fund til að hópfjármagna næstu plötuna mína, Tár í morgunsárið, sem verður fimmta sólóplatan mín. Svo verð ég með tónleika á Húrra fimmtudaginn 16. febrúar en það verður degi eftir að söfnuninni lýkur. 

Vonandi uppskerutónleikar, ef söfnunin gengur upp,“ segir Ólöf og bætir við að hún sé mjög bjartsýn á að það takist.

Hér má heyra lagið Englar og Dárar eftir Ólöfu:

Ólöf Arnalds hefur gefið frá sér fjórar sólóplötur en frumburður hennar, Við og við, leit dagsins ljós árið 2007. Hún hefur tvisvar hlotið íslensku tónlistarverðlaunin og verið tilnefnd til Nordic Music Price. Ólöf hefur leikið á tónleikum víðs vegar um heiminn og komið þar fram í útvarpi og sjónvarpi.

„Þessi plata er búin að fá að malla lengi með mér. Einhverra hluta vegna er ég tilbúin núna að raungera hana.“

Hún segir ferlið hafa gengið frábærlega.

„Öll lögin eru samin. Nú er bara að klára að útsetja og taka upp.“

Í spilaranum hér að neðan má sjá tónlistarmyndband Ólafar við lagið Patience frá árinu 2014.

Ólöf sækir innblásturinn víða og segist alæta á tónlist.

„Það er mjög sjaldan sem mér þykir ekki eitthvað áhugavert við tónlist sem ég heyri. 

En ég sæki fyrst og fremst innblástur í góð samtöl, vináttu, þögn og ást,“ 

segir hún að lokum.