Leggur áherslu á mál sem formaður VR hafi sýnt lítinn áhuga

Elva Hrönn Hjartardóttir býður sig fram til formanns VR ásamt Ragnari Þór Ingólfssyni sem sækist eftir endurkjöri. Einnig verður kosið um sjö af fjórtán stjórnarmönnum og þrjá varamenn í stjórn. Þau Elva Hrönn og Ragnar Þór mættust í Pallborðinu á Vísi í dag. Hún segist hafa aðrar áherslur en sitjandi formaður.

„Það eru ýmis málefni sem er verið að vinna í en ég tel að við gætum verið að vinna miklu meira í. Þar þarf líka áhuga formanns á málefnunum. Því það sem hann brennur fyrir fær vissulega eitthvað brautargengi. Að sama skapi ef hann minnist ekki á önnur málefni er voðalega lítið rætt um þau nema í einhvern ákveðinn tíma,“ sagði Elva Hrönn meðal annars.

Það ætti við um málefni unga fólksins, útlendinga sem væru um 14 prósent félagsmanna og jafnréttismál. Formaður stærsta stéttarfélags landsins mætti ekki yfirgefa herbergið í hver sinn sem hann mætti einhverri mótspyrnu.

Ragnar Þór sagði unnið í fjölmörgum málum sem ekki fengju athygli í fjölmiðlum. Til að mynda hefði VR lagt mikla vinnu í húsnæðismál unga fólksins með tilurð hlutdeildarlána. Þar hefðu stjórnvöld að vísu ekki staðið við sitt eins og í mörgu öðru sem tengdist loforðum þeirra við gerð lífskjarasamninganna.

„Við höfum svo sannarlega verið að beita okkur fyrir þessa hópa sem eru hvað viðkvæmastir. Eru að lenda í því að fá tugþúsunda hækkanir á leigu. Við hótuðum því til dæmis að taka alla sjóði VR út úr Kviku banka, sem var þá nýbúinn að taka yfir Gamma sem þá átti Almenna leigufélagið. Sem varð til þess að allar hækkanir voru dregnar til baka og fólki varð boðinn langtíma samningur og meiri stöðugleiki,“ sagði Ragnar Þór.

Þau voru sammála um að húsnæðismálin væru mál málanna almennt og við gerð nýrra samninga sem tækju við af þeim skammtímasamningi sem nýlega var gerður. Þau greindi hins vegar á um samstarf við önnur verkalýðsfélög og stöðu félagsins innan Alþýðusambandsins.

Pallborðið í heild sinni má sjá í spilaranum hér fyrir neðan.