Hlutafjárútboð Ljósleiðarans bjóði hættunni heim

Meirihluti rýnihóps borgarráðs hefur gefið Ljósleiðaranum græna ljósið til að ráðast í hlutafjárútboð um allt að ellefu milljarða króna. Borgarfulltrúi Sósíalistaflokks Íslands vill að fjarskiptainnviðir séu í eigu almennings og gefur lítið fyrir varnagla meirihlutans um að halda meirihlutastjórn í fyrirtækinu.

Eftir kaup franska fyrirtækisins Ardían á Mílu hf. af símanum óskaði stjórn Ljósleiðarans þann 24. október eftir því að eigendur staðfesti samþykkt stjórnar og hluthafafundar um hlutfjáraukningu til að tryggja samkeppni á fjarskiptamarkaði. Borgarráð skipaði um það sérstakan rýnihóp sem var falið að vinna umsögn fyrir ráðið um tillögu stjórnar Ljósleiðarans sem var kynnt á dögunum. Niðurstaða rýnihópsins er að aukið hlutafé sé bæði óhjákvæmilegt og æskilegt við núverandi aðstæður á markaði. Hópurinn leggur til að Orkuveita Reykjavíkur, sem eigandi Ljósleiðarans ehf, fái heimilt til að auka hlutafé Ljósleiðarans um allt að ellefu milljarða króna með útboði hlutafjár.

Trausta Breiðfjörð Magnússyni, borgarfulltrúa Sósíalistaflokksins, hugnast ekki þessi leiðangur.

„Okkur finnst að Ljósleiðarinn eigi að vera í eigu almennings. Þetta eru grunninnviðir sem tryggja það að við höfum aðgang að interneti og eins og við höfum sagt þá þurfum við internetið til að gera nánast allt í daglegu lífi; skrá okkur inn á heimabankann, rafræn skilríki og að komast í samband við umheiminn og þannig mætti lengi telja. Það er mikil fákeppni á þessum markaði. Það er eitt annað fyrirtæki sem er þarna inni annar en Ljósleiðarinn og ef við förum að einkavæða Ljósleiðarann þá erum við að bjóða hættunni heim.“

Í bókun Pírata við málið segir að hlutafjárútboð sé sú leið sem best tryggi framtíð Ljósleiðarans og hlutverki hans. Hvorki komi til greina að selja Ljósleiðarann í heild, né að missa meirihlutastjórn í fyrirtækinu. Trausti telur að þetta skref opni á allsherjar einkavæðingu á fjarskiptainnviðum.

„Þau segja það í umsögninni, meirihlutinn, að þau muni skoða það, ef til þess kemur að það verði önnur einkavæðing þá gæti Orkuveitan mögulega veitt þeim hlutafé en fyrst þau gerðu það ekki núna þá efast ég um að þau ætli að gera það næst. Miðað við fyrirætlanir þeirra þá gæti það alveg verið að þau hyggi á enn frekari einkavæðingu á næstu árum,“ segir Trausti.

Hann segir Sósíalista í borginni ætla að láta í sér heyra.

„Við viljum að Orkuveita Reykjavíkur veiti hlutafé. Við erum með fordæmi í dómi Hæstaréttar að Orkuveitunni sé heimilt að gera það. Við viljum líka beina því til ríkisvaldsins og löggjafans að fá undanþágu frá EES tilskipunum sem kveða á um að fjarskiptainnviðir verði að vera á svokölluðum samkeppnismarkaði. Það eru séríslenskar aðstæður. Hér eru fáir íbúar og þetta er lítið land. Svona innviðir ættu bara að vera í eigu almennings en ekki þannig gerður að það sé búin til einhver fölsuð samkeppni sem er í rauninni bara fákeppni og einokun.“

Hér er hægt að lesa nánast um umsögn rýnihóps borgarráðs um erindi Ljósleiðarans.

Hér er hægt að lesa nánar um bókanir nokkurra flokka við málið.