Bjart­viðri og nætur­frost

Í hugleiðingum veðurfræðings hjá Veðurstofunni segir að hvassast verði á Austfjörðum, allt að fimmtán metrar á sekúndu. 

„Núna í morgunsárið er létt- eða hálfskýjað í öllum landshlutum en er líður á daginn þykknar upp sunnantil og líkur á stöku skúr eða slydduél á Suðausturlandi. Hiti 0 til 8 stig, svalast norðaustanlands, en hlýjast með suðurströndinni. Líkt og gjarnan fylgir bjartviðri á þessum tíma árs er þó víða von á næturfrosti,“ segir á vef Veðurstofunnar.

Veðurhorfur á landinu næstu daga

Á sunnudag:

Norðlæg átt, 5-13 m/s, hvassast með norður- og norðausturströndinni. Bjartviðri framan af degi, en þykknar upp með stöku él á norðanverðu landinu seinni partinn. Vægt frost norðantil, en hiti annars 1 til 7 stig.

Á mánudag:

Norðlæg eða breytileg átt, 3-8 m/s. Lítilsháttar él og vægt frost á Norður- og Austurlandi, en annars bjart með köflum og hiti að 5 stigum.

Á þriðjudag og miðvikudag:

Hæg breytileg átt og skýjað með köflum, en austanstrekkingur og stöku skúr við suðurströndina. Hiti 0 til 7 stig, svalast norðaustanlands.

Á fimmtudag:

Útlit fyrir suðlæga átt með rigningu og hlýnandi veðri, en þurrt að kalla norðaustanlands.

Á föstudag:

Líklega suðlæg átt og skúrir á víð og dreif. Hlýnandi veður.