Fínasta veiði í Hlíðarvatni

Veiðin síðustu daga hefur verið ágæt hjá mörgum sem hafa kíkt í vatnið en það er samt alltaf þannig að reynsluboltarnir eru aflahæstir þarna. Það er fátt sem heitir byrjendaheppni í bleikju í Hlíðarvatni en það er líka það sem gerir þetta vatn vinsælt. Veiðimenn og veiðikonur sem mæta reglulega í vatnið í misjöfnum aðstæðum eru alltaf að læra betur og betur á vatnið og með þeirri ástundun er yfirleitt óhjákvæmilegt að árangurinn verður betri.

Bleikjan í vatninu er yfirleitt 1-3 pund en inná milli veiðast reglulega 3-5 punda bleikjur og af og til stærri bleikjur en það. Á hverju ári sjást þessar stóru og þá erum við að tala um bleikjur sem ná líklega 70 sm og bústnar eftir því. Bleikjan úr vatninu er virkilega góður matfiskur og sé rétta flugan borin fram fyrir hana, getur dagsveiðin orðið nóg í veislu fyrir stóra fjölskyldu.