Dor­rit fagnar hval­veiði­banninu og lýsir eigin reynslu af dýrunum

„Ég er ekki sérfræðingur um hvali eða hvalveiðar. En fyrst að hvalveiðar skapa Íslandi svona slæmt orðspor erlendis og takmörkuðum hagnaði þá er það eina sem þarf að taka tillit til fólkið sem starfar við veiðarnar,“ segir Dorrit.

Dorrit, sem er ísraelsk að uppruna en bjó lengi í Bretlandi, segist hafa heyrt mikið af slæmri umfjöllun erlendis um hvalveiðar Íslendinga.

„Ég er mjög á móti því að segja fólki fyrir verkum. Ef einhver segir mér fyrir verkum á ég það til að gera hið öfuga,“ segir Dorrit. „En hvers vegna gera þetta fyrst að það er enginn auðsjáanlegur hagnaður? Og hvalirnir þjást greinilega. Það er ekki hægt að drepa hval snögglega. Mér er sagt að það taki tvo tíma að drepa hval og það heyrast öskur í grey dýrinu.“

Báru skjaldbökuolíu á háhyrning

Þrátt fyrir að vera ekki sérfræðingur um hvali hefur Dorrit trúlega meiri reynslu af þeim en flestir. En hún hjálpaði eitt sinn til við að flytja háhyrning úr safarígarði í Lundúnum.

„Það var ótrúleg lífsreynsla, að heyra og finna fyrir því hvernig hvalirnir tala saman,“ segir Dorrit um aðgerðina sem var einhvern tímann á áttunda áratugnum.

Sirkusstjórinn Billy Smart Jr., sem rak Windor Safari Park, var vinur Dorrit. Hann hafði óskað eftir sjálfboðaliðum til að hjálpa við að flytja einn háhyrninganna til Flórída í Bandaríkjunum og Dorrit svaraði kallinu.

„Við vorum tíu sjálfboðaliðar og hvalnum líkaði auðsjáanlega við sum okkar og lét í sér heyra,“ segir Dorrit. Háhyrningurinn fór hins vegar í manngreiningarálit og kom bersýnilega ekki jafn vel fram við aðra. „Við fengum öll mismunandi skjaldbökuolíur til þess að bera á hvalinn. Síðan kom risavaxin 747 breiðþota með innbyggðu vökvunarkerfi og flutti hvalinn átta klukkutíma flugferð til Flórída,“ segir Dorrit.

Mikilvægir í vistkerfinu

„Ég elska hvali, ég elska öll dýr,“ segir Dorrit og bendir á að hvalir hafi mjög mikilvægu hlutverki að gegna í vistkerfinu.

„Þeir borða mest megnis svif og einstaka sinnum gleypa þeir sardínu eða lítinn fisk. Hvalirnir melta svifið og kúkurinn úr þeim er mikilvægur til þess að halda sjónum hreinum og veita fiskum næringu,“ segir hún.

Hvalveiðimenn fái bætur

Tímasetning hvalveiðibannsins, daginn áður en vertíðin átti að hefjast, hefur verið gagnrýnd. Dorrit segist ekki hafa skoðun á henni.

„Mér er hins vegar umhugað um fólkið sem treystir á veiðarnar sem sitt lífsviðurværi. Þetta er lítið samfélag og það er mikilvægt að þetta fólk fái sanngjarnar bætur og önnur störf,“ segir hún og á við Akranes og Hvalfjarðarsveit þaðan sem flestir hvalveiðimennirnir koma.

Hún á þó ekki von á því að það verði vandamál fyrir fólkið að fá aðra vinnu. Hún hafi nýlega talað símleiðis við kvikmyndaframleiðanda sem þurfti að hætta við að taka upp kvikmynd á Íslandi. Hér hafi hvorki verið til hótelherbergi né mannskapur til þess að aðstoða við framleiðsluna.

Dorrit segist heldur ekki hafa skoðun á því hvort að hvalveiðibannið kunni að verða til þess að ríkisstjórnin springi. „Hvenær eru stjórnmálamenn ekki að rífast? En ég veit ekkert hvort að stjórnin springi út af þessu eða ekki,“ segir hún.