Loka­um­ferðin er hafin - Leitin að besta SS pylsu­laginu

Sex flytjendur voru valdir í vor úr stórum hópi umsækjenda til að taka þátt í keppninni auk þess sem hópurinn keppti einnig um besta frumsamda lagið.

Um leið og tilkynnt var um hvaða þrír flytjendur kæmust áfram var tilkynnt að Gígja Marín hefði unnið keppnina um besta frumsamda lagið sem ber heitið I know.

Hér fyrir neðan er hægt að kjósa um bestu nýju útgáfuna af SS pylsulaginu. Fyrir neðan kosningagluggann má hlusta á nýju útgáfurnar þrjár.

Gunnar og Benedikt

Benedikt Gylfason og Gunnar Darri Bergvinsson segja þátttökuna í Skúrnum hafa verið virkilega skemmtilega. „Það var í fyrsta lagi mjög gaman að búa til nýja útgáfu af þessu ódauðlega lagi sem líklega allir Íslendingar þekkja og geta sungið með en líka af því það er eitthvað sem við hefðum aldrei gert nema út af þessari keppni.“

Þeir segjast aðeins hafa verið að fikta við að gera remix og meira frumsamið efni saman sem er komið mislangt og kemur kannski út á næstu mánuðum.

Sprite Zero Klan

Daníel Óskar Jóhannesson og Kolbeinn Sveinsson skipa dúettinn Sprite Zero Klan. „Í stuttu máli er þetta búið að vera mjög gaman,“ segja þeir félagar. „Við elskum slöngur, viljum hafa allt á þeim og sinnepið bæði undir og yfir. Við erum miklir SS menn svo þetta er búið að vera svolítið persónulegt.“

Þeir eru að gera tónlist á fullu í sumar og haustið verður eintóm veisla að þeirra sögn. „Mikið blót og mikið partý. Planið er að gefa hressilega út og halda þjóðinni á tánum. Taka svo endanlega yfir og einoka markaðinn.“

Sæborg

Sæborg eru skipuð Gísla Þór Brynjólfssyni, Kára Jóhannssyni og Pétri Gunnari Guðmundssyni. „Skúrinn hefur verið ótrúlega skemmtileg áskorun og kærkomin vítamínsprauta fyrir okkur í Sæborg,“ segja þeir félagar. „Það að við séum komnir alla leið hingað í úrslit er alveg hreint geggjað og viljum við þakka ykkur öllum aftur fyrir að hlusta og kjósa.“

Þeir segjast vera að vinna að sinni fyrstu plötu þessa dagana og því eru fleiri lög væntanleg á næstunni. „Næsta gigg verður á Fiskideginum mikla í ágúst og við munum svo spila meira í haust.“

Lögin þrjú sem komust áfram verða spiluð í útvarpi og sjónvarpi í sumar og munu lesendur Vísis kjósa á milli þeirra þriggja en kosningu lýkur í ágúst.

Skúrinn er í samstarfi við SS.