Draga úr fjölda hælis­­leit­enda í Reykja­nes­bæ og vilja auka virkni

Stofnunin hefur ásamt Reykjanesbæ kynnt aðgerðaáætlun til að bregðast við þeim mikla fjölda sem dvelur þar samanborið við önnur sveitarfélög. Mikið hefur verið rætt um fjölgun flóttamanna og hælisleitenda í bænum síðustu mánuði og formaður bæjarráðs sagt innviði sprungna vegna fjöldans.

„Meginmarkmiðið er annars vegar að draga til lengri tíma litið úr fjölda umsækjenda sem dvelja í bænum og hins vegar að auka virkni og vellíðan fólks á meðan það bíður eftir afgreiðslu umsóknar sinnar hjá Útlendingastofnun,“ segir í tilkynningu frá sveitarfélaginu og Vinnumálastofnun sem sér um þjónustu við umsækjendur um alþjóðlega vernd.

Hyggst stofnunin leitast við að fækka umsækjendum sem dvelja í Reykjanesbæ myndist svigrúm í búsetuúrræðum Vinnumálastofnunar eða hjá sveitarfélögum sem stofnunin er með samninga við. Að sögn hennar er einnig unnið að því að fjölga sveitarfélögum sem hýsa umsækjendurna og finna hentuga staðsetningu fyrir einingahús í samvinnu við Reykjavíkurborg. Þá leiti Framkvæmdasýslan/Ríkiseignir að húsnæði vítt og breitt um landið. 

Koma á fót virknimiðstöð og efla almenningssamgöngur

Aðgerðaáætlun Vinnumálastofnunar og Reykjanesbæjar felur meðal annars í sér tómstundaúrræði fyrir fólk á öllum aldri og opnun virknimiðstöðvar sem verður í húsnæði sem áður hýsti Officera-klúbbinn á Ásbrú. Stendur þar til að bjóða upp á námskeið, smiðjur og fjölbreytta dagskrá, af því er fram kemur í tilkynningu. 

Í janúar undirrituðu félags- og vinnumarkaðsráðuneytið, Vinnumálastofnun og Reykjanesbær viljayfirlýsingu um að greindar yrðu þær áskoranir sem Reykjanesbær stæði frammi fyrir vegna fjölgunar umsækjenda um alþjóðlega vernd sem dveljast í sveitarfélaginu á vegum ríkisins og leitað lausna. Áætlunin sem samanstendur af sextán aðgerðum er sögð afrakstur þeirrar vinnu.

Að sögn Vinnumálastofnunar eru aðgerðir þegar hafnar samkvæmt áætluninni og hafa börn umsækjenda um alþjóðlega vernd meðal annars sótt tómstundanámskeið í sumar sem komið var á fót á Ásbrú. Þátttaka hafi verið góð og daglega hafi á bilinu 60 til 70 börn tekið þátt á aldrinum sex til sextán ára.

Önnur aðgerð sem er sögð þegar hafin snýr að samgöngumálum og er ætlað að mæta auknu álagi á almenningssamgöngur frá Ásbrú og niður í miðbæ Reykjanesbæjar.

Fá aðkomu sjálfboðaliða

Á næstunni stendur einnig til að koma á fót þróunarskóla í Klúbbnum undir heitinu Friðheimar, auka þjónustu við flóttafólk og umsækjendur um alþjóðlega vernd með aðkomu sjálfboðaliða úr nærsamfélaginu og ráðast í hugmyndasöfnun meðal umsækjenda um það hvað fólk vilji helst gera og hvernig virkni það mæli með. 

Jafnframt kemur fram í yfirlýsingu Vinnumálastofnunar og Reykjanesbæjar að þjónustu- og móttökuteymi alþjóðateymis Reykjanesbæjar muni verða tvo morgna í viku á Ásbrú með upplýsingagjöf um þá þjónustu sem bærinn veiti og leiðbeina fólki varðandi nytsamlega hluti.