Hiti að á­tján stigum sunnan heiða

Á vef Veðurstofunnar segir að það verði skýjað á norðan- og austanverðu landinu og sums staðar þokuloft eða súld, en léttskýjað suðvestan til. Hiti verður að átján stigum sunnan heiða í dag, en mun svalara úti við norður- og austurströndina.

„Skil lægðarinnar nálgast seint á morgun og hvessir þá og fer að rigna á Suðausturlandi um kvöldið, en hlýnar ögn í veðri. Heggur hiti þá nærri 20 stigum í uppsveitum Suðurlands og jafnvel einnig á Vesturlandi.

Hæg austlæg eða breytileg átt á laugardag, dálítil væta suðaustanlands til Austfjarða, annars bjart og hlýtt veður með hita yfir 20 stigum þegar best lætur,“ segir á vef Veðurstofunnar.

Veðurhorfur á landinu næstu daga

Á föstudag: Austan og norðaustan 5-10 m/s, en 10-15 allra syðst. Yfirleitt bjart með köflum, en skýjað austantil og sums staðar dálítil væta þar. Hvessir og fer að rigna á Suðausturlandi með kvöldinu. Hiti 8 til 19 stig, hlýjast suðvestanlands.

Á laugardag: Austlæg eða breytileg átt, 3-10 m/s og bjart með köflum, en hvassara og dálítil rigning suðaustanlands. Smáskúrir norðaustanlands um kvöldið. Hiti víða 13 til 20 stig, hlýjast inn til landsins.

Á sunnudag: Norðaustan og austan 5-13 m/s og lítilsháttar rigning norðan- og austanlands og kólnar heldur á þeim slóðum. Áfram bjartviðri og hlýtt suðvestantil.

Á mánudag og þriðjudag: Norðlægar áttir og væta með köflum, einkum fyrir austan. Fremur hlýtt í veðri á Suður- og Vesturlandi, en annars svalt.

Á miðvikudag: Útlit fyrir hæga vinda, skýjað með köflum og hlýnandi veður víða um land allt.