Vikingar með marka­töluna 13-2 í fjórum undan­úr­slita­leikjum á fimm árum

Víkingur vann 4-1 sigur á KR í undanúrslitaleik í Víkinni sem var fjórði sigur liðsins í undanúrslitum á fimm árum.

Markatala Víkingsliðsins í þessum fjórum undanúrslitaleikjum er 13-2.

Auk sigursins á KR í gærkvöldi þá vann Víkingur 3-0 sigur á Breiðabliki í undanúrslitaleiknum í fyrra, 3-0 sigur á Vestra í undanúrslitaleiknum 2021 og svo 3-1 sigur á Blikum í undanúrslitaleiknum 2019.

Bikarkeppnin var ekki kláruð sumarið 2020 vegna kórónuveirunnar en þá voru Valur, KR, ÍBV og FH komin í undanúrslitin. Víkingar duttu út það sumar í sextán liða úrslitum á móti Stjörnunni.

Ari Sigurpálsson skoraði tvö síðustu mörk Víkinga í sigrinum í gær en áður höfðu þeir Aron Elís Þrándarson og Erlingur Agnarsson komið Víkingsliðinu í 2-0 á fyrstu tuttugu mínútunum.

Í fyrra þá skoraði Erlingur tvö mörk í sigrinum á Blikum en þriðja markið skoraði Karl Friðleifur Gunnarsson. Öll mörk Víkingsliðsins í þeim leik komu á fyrstu tuttugu mínútunum.

Sumarið 2021 þá vann Víkingur 3-0 sigur á Vestra í leik sem fór fram á KR-vellinum vegna slæmra vallaraðstæðna fyrir vestan. Kristall Máni Ingason skoraði öll þrjú mörk Víkingsliðsins í leiknum.

Sumarið 2019 þá vann Víkingur 3-1 sigur á Blikum í undanúrslitunum en þá skoruðu þeir Óttar Magnús Karlsson, Nikolaj Hansen og Guðmundur Andri Tryggvason mörk liðsins eftir að Blikarnir komust yfir í 1-0.