„Ég sat bara og grét yfir þessu í gær­kvöldi“

Birta og Othman búa í borginni Essaouira ásamt fjórum börnum sínum.  Upptök skjálftans voru í Atlasfjöllum. 2.900 eru talin látin, yfir fimm þúsund slösuð og mikill fjöldi enn týndur undir rústum. 

Þegar ljóst var hversu mikil eyðileggingin var hófu hjónin söfnun. Hún hefur gengið vel síðustu daga og því fór Othman í fyrradag í eitt þorpanna sem hvað verst fór í jarðskjálftanum.

„Maðurinn minn fór, ásamt öðrum, á nokkrum fjórhjóladrifnum jeppum upp í þorp sem erfitt er að komast að á góðum degi,“ segir Birta í samtali við fréttastofu, en vegir hafa víða farið mjög illa.

Hittu heimamenn

Hún segir jeppana hafa verið fulla af hjálpargögnum eins og fatnaði, lyfjum og mat.

„Þeir fóru uppeftir og komu heim í nótt. Það fór allt mjög vel en það voru átakanleg vídjóin sem þeir tóku,“ segir Birta en hún setti saman myndband úr þeim sem má horfa á hér að neðan.

„Ég sat bara og grét yfir þessu í gærkvöldi,“ segir Birta en í eiginmaður hennar, og aðrir sem voru með honum, voru leiddir í gegnum þorpið af heimamanni. Á meðan sagði hann þeim hvað gerðist þegar jarðskjálftinn reið yfir.

Birta segir þorpið nú yfirgefið en að heimamenn hafi reynt að týna eitthvað saman af eigum sínum til að fara með í búðirnar sem þau búa í núna hinum megin í fjallinu.

„Við viljum halda áfram að styðja við þetta þorp,“ segir Birta þó meðvituð um að staðan sé eins í hundruð annarra þorpa.

„Við viljum einblína okkar orku á staði þar sem við höfum tengingu,“ segir hún og að í dag hafi þau sent þeim pening til að kaupa lagnir sem hægt er að leggja til að fá rennandi vatn inn á svæðið aftur.

„Það er það fyrsta sem við gerðum, auk þess að senda neyðarpakkana,“ segir Birta og að allur sá peningur sem safnist fari í þau verkefni sem mest þörf er á.

Enn hægt að leggja þeim lið

Söfnun er enn opin og er hægt að leggja inn á Birtu vilji fólki leggja þeim lið.

„Veturinn er að koma og við viljum vera til staðar fyrir þetta fólk og hjálpa þeim að byggja upp enn þá sterkara og betra samfélag en var áður. Á góðum degi lifa þau hörðu lífi á þessum stað og við viljum leggja okkar af mörkum til að styðja við þetta samfélag. Svo þau geti byggt samfélagið upp sterkara en áður,“ segir Birta.

Hún hóf söfnunina fyrir fjórum dögum en allt fjármagn sem þau safna fer í þau verkefni eða samtök þar sem þörfin er mest. Í Instagram-færslu fyrr í vikunni segir hún ástandið hræðilegt í fjallaþorpum nærri upptökum skjálftans.

Hægt er að fylgjast með gangi söfnunar og aðstoðinni á Instagram þeirra hjóna hér.

Hægt er að styðja við söfnuna með því að leggja inn á reikning Birtu:

Reikningsnúmer : 0549-26-002689

Kennitala : 260191-2689