Sonur Birgis Steins og Rakelar kominn með nafn

Parið deildi gleðifregnunum í sameiginlegri færslu á samfélagsmiðlum. 

Emanúel Dagur kom í heiminn 28. ágúst síðastliðinn og er fyrsta barn parsins. 

Parið hefur verið saman um nokkurra ára skeið. Birgir Steinn fór á skeljarnar í september í fyrra og bað um hönd Rakelar. Eins og við var að búast samþykkti hún bónorðið og birti mynd af hringnum með Eiffel-turninn í bakgrunn.

Tónlistaráhuginn byrjaði snemma

Fyrr á árinu fór Birgir í einlægt viðtal í Einkalífinu á Vísi og Stöð 2 + þar sem hann spjallaði um tónlistarferilinn og baráttu sína við kvíða sem hefur fylgt honum frá unga aldri svo eitthvað sé nefnt.

Birgir er sonur tónlistarmannsins Stefáns Hilmarssonar og á þvi ekki langt að sækja hæfileikana. Hann fann áhugann snemma á tónlist og byrjaði að fikra sig áfram á hinum ýmsu hljóðfærum áður en hann fór sjálfur að semja tónlist og syngja.

Birgir gaf út lagið Kvíðinn í fyrra með hljómsveitinni Draumfarir, sem samanstendur af Birgi og Ragnari Má Mássyni. Hann segir textann persónulegan sem tók á að semja.