Sveið í augun í marga daga eftir froðudiskó

Hér má sjá tónlistarmyndbandið sem leikstýrt er af Sveinbirni Hafsteinssyni og Guðný Maren Valsdóttur. Listræn stjórn og klipping var í höndum Jóns Frímannssonar:

Lagið kom út í sumar og var markmiðið að sögn Jóns að reyna aðeins að hjálpa landsmönnum að komast í gegnum haustlægðirnar.

Ósvikin stemning á sápukúludiskóteki

„Lagið er um manneskju sem tekst að gleðina á sápukúludiskóteki og tapar sér í ósvikinni stemmningu. Gleymir sér í fílíng í smástund. En svo er þetta líka nauðsynleg áminning um að við erum alltaf bara einni sápukúluvél frá góðu froðudiskóteki,“ segir Jónfrí og bætir við að froðudiskóshugmyndin geri mikið fyrir mig. 

„Í skammdeginu er nauðsynlegt að minna sig á að við erum öll bara einni sápukúluvél frá góðu froðudiskóteki. Ég er enginn sérstakur dansari en ég tók þetta á mig. Reyndi svo bara að bæta það upp með að vera í nettum fíling. En farið varlega ef þið ætlið að reyna þetta heima, froðan lekur í augun og mann svíður í marga daga á eftir.“

Í fréttatilkynningu segir að Andalúsía sé byggð á sönnum atburðum en fært í stílinn því sagan þolir ekki alveg dagsljósið. Sveitin hefur haft í nógu að snúast undanfarið og er tilbúin með breiðskífu sem ber heitið Draumur um Bronco.

„Draumur um Bronco kemur út í mars á næsta ári á vínyl og streymisveitum. Umslagið er hannað af Bobby Breiðholt og er sérlega glæsilegt. Ég held það séu örlög okkar sem fæðumst í áttunni að vera haldin smá nostalgíuþrá og þessi Bronco er bara farartækið til að komast þangað. 

Stundum finnst manni nútíminn líka svo glataður að það er engin leið að yrkja um hann án þess að hljóma hundleiðinlegur. Kannski eru yrkisefnin að einhverju leyti tímalaus en það er einhver fortíð í hljómi plötunnar. Gamlir lampamagnarar, skrítin hljómborð sem suðar í og segulbönd. Erfiða leiðin, hún er skemmtilegust,“ segir Jón að lokum.

Hér má hlusta á Jónfrí á streymisveitunni Spotify.