Hlynur sem gengur gjarnan undir nafninu HJ Elite greindi rúmlega 38 þúsund fylgjendum sínum á Instagram frá þessu í dag með því að birta tölvugerða mynd af sér fyrir framan Bessastaði. Hann deildi sömu mynd á Twitter og hefur fengið góð viðbrögð.
Jæja Herra Guðni gefur víst ekki kost á sér til áframhaldandi forsetasetu, hans og Elizu verður sárt saknað á Bessastöðum, Ég hef lagst undir feld og spurt er Ætti maður að gefa kost á sér og bjóða sig fram hvað segir þú þá tillögu og hvernig ætti næsti forseti ætti að vera ? pic.twitter.com/L2WzU2CXlA
— HJ elite (Hlynur Jonsson) (@hj_elite) January 6, 2024
Við myndina skrifar hann „Jæja Herra Guðni gefur víst ekki kost á sér til áframhaldandi forsetasetu, hans og Elizu verður sárt saknað á Bessastöðum.“
Síðan segir Hlynur „Ég hef lagst undir feld“ og spyr síðan fylgjendur sína „Ætti maður að gefa kost á sér og bjóða sig fram? [H]vað segir þú [um] þá tillögu og hvernig ætti næsti forseti að vera?“
Það er spurning hvort hann bætist við þann góða hóp sem þegar hefur boðið sig fram.
Fjölgar í framboðsflórunni?
Frá því að Guðni Th. Jóhannesson, forseti, greindi frá því í nýársvarpi sínu að hann hygðist ekki bjóða sig fram til áframhaldandi setu á Bessastöðum hefur fjöldi fólks tilkynnt að það sé annað hvort að íhuga framboð eða ætli að bjóða sig fram.
Fyrst bárust fréttir af því að Halldór Laxness, öðru nafni Dóri DNA, ætlaði að bjóða sig fram ef hann fengi 500 læk á Twitter.
Þrátt fyrir gamansaman tón virtist Halldór vera að íhuga málið af alvöru. Nokkrum dögum síðar greindi hann hins vegar frá því að hann myndi aðeins bjóða sig fram ef það gysi á þrettándanum, þ.e. í dag. Sjáum hvað setur næsta klukkutímann.
Að gefnu tilefni.
— Halldór Halldórsson (@doridna) January 2, 2024
Eftir að hafa ráðfært mig við mína nánustu hefur komið í ljós að þessi hugmynd mín, leggst ákaflega illa í fólk.
Ég hef því ákveðið eftirfarandi.
Muni gjósa aftur á þrettándanum (eins og ég finn á mér) - fer ég í framboð.
Annars ekki.
Björgvin Páll, handboltamarkvörður, greindi frá því að hann hefði ekki tekið neina ákvörðun um forsetaframboð þar sem hann ætlaði að einbeita sér að EM í handbolta. Björgvin skrifaði einmitt barnabókina Barn verður forseti og íhugaði að bjóða sig fram til borgarstjóra fyrir Framsókn í fyrra en gerði það ekki.
Fjöldi fólks hefur einnig verið mátaður við embættið. Þar má nefna rithöfundinn Sigríði Hagalín, Katrínu Jakobsdóttur, Ölmu Möller landlækni, Ingibjörgu Sólrúnu, Rannveigu Rist og Björn Zoega. Aðspurður sagði sá síðastnefndi að hann útilokaði ekki forsetaframboð.
Aðeins karlar boðið sig formlega fram
Axel Pétur Axelsson, forsvarsmaður Frelsis TV, tilkynnti framboð sitt á miðlinum Brotkasti á nýársdag en hann bauð sig einnig fram árið 2020.
Miðvikudaginn 3. janúar bættust síðan tveir við í framboðsflóruna. Arnar Þór Jónsson, hæstaréttarlögmaður og varaþingmaður Sjálfstæðisflokksins, boðaði til blaðamannafundar á heimili sínu og tilkynnti að hann hefði sagt sig úr flokknum og hann ætlaði að bjóða sig fram til forseta.
Samdægurs tilkynnti eilífðarframbjóðandinn Ástþór Magnússon einnig um framboð sitt en það er í fimmta sinn sem hann býður sig fram til embættisins.
Á fimmtudag greindi ísdrottningin Ásdís Rán frá því að hún væri að íhuga að bjóða sig fram til forseta. Það var þó ekki ljóst hvort um grín eða alvöru væri að ræða þar sem hún hafði svo framúrstefnulegar hugmyndir um hvað þyrfti að gera. Hún vildi Rottweiler-hunda á Bessastaði, svartan Bentley, sérmerkta einkaþotu, sértæka skatta á fólk og fyrirtæki og flytja höfuðstaðinn til Akureyrar.
Í gær bættist svo við nýjasti frambjóðandinn til forsetaembættisins. Það var hinn 37 ára gamli Tómas Logi Hallgrímsson, rafvirki og björgunarsveitarmaður úr Sandgerði, sem hefur fjallað um starf björgunarsveitarmanna á samfélagsmiðlum undir nafninu Kjullibangsi.
