„Mér varð hrein­lega ó­glatt"

Í dönsku sjónvarpsþáttaseríunni Hættulegur strákur um Sigurð Inga Þórðarson, sem betur er þekktur sem Siggi hakkari, og Wikileaks er komið víða við sögu. Meðal annars er þar undir grein sem Bjartmar skrifaði og vann meðal annars upp úr átta tíma viðtali við Sigga hakkara. Bjartmar hefur látið hafa það eftir sér, í umræðuþætti Samstöðunnar sem sjá má að neðan, að hann hafi verið lengi að jafna sig eftir þá raun, sem fólst í því að ræða við svo siðblindan einstakling. Það þurfti í raun að fara yfir hvert orð sem Siggi sagði, engu var treystandi.

Við lok þáttaraðarinnar verður einkennileg vending sem er til þess fallin að gera trúverðugleika Wikileaks, Stundarinnar og Bjartmars að engu. Þá stígur Kristjón Kormákur Guðjónsson, fyrrverandi ritstjóri með meiru, fram og hefur ótrúlega sögu að segja.

Nefnilega þá að hann hafi nánast skrifað grein sem Bjartmar er skrifaður fyrir, grein sem skiptir miklu í þessu máli öllu þar sem fram kemur að Siggi hakkari hafi logið í FBI, frá A til Ö. Og það hafi hann gert sem starfsmaður Wikileaks. FBI hafði þá sem nú Júlían Assange, stofnanda Wikileaks, til rannsóknar.

„Já, þessi Wikileaks-sirkus. Jæja,“ segir Kristjón Kormákur. Frásögn hans er til þess fallin að setja allt Wikileaks-málið í nýtt samhengi. Þáttagerðarmennirnir eru í það minnsta sannfærðir um að svo sé sem og Siggi sjálfur. Frásögn Kristjóns er eftirfarandi:

Bjartmar kunni ekki að skrifa

„Ég sem sagt ræð mig til Wikileaks, ég held að það hafi verið í lok febrúar. Kristinn Hrafnsson hefur samband og spyr mig hvort ég sé til í að taka að mér tveggja mánaða verkefni. Ca. Sem gengur út á að finna skít um Sigga.

Ég held að þetta hafi verið fyrsta daginn að ég fer að leita; hvaða félög eru skráð á Sigga og bara alla í kringum hann. Svo kom hann inn og eftir okkur beið stútfullur póstkassi. Þarna var ég kominn með blaðamann með mér. Bjartmar. 

Hann hafði reynst frábær í síma og ósvífinn í að fara af stað, tilbúinn að fara af stað, svolítið eins og einn annar blaðamaður sem ég hef haft en … já, að vaða í hlutina. Þó hann kynni ekki „jack shit“ að skrifa. Ég þurfti að kenna honum það.“

Klippt er yfir í aðrar aðstæður og nú talar Kristjón ensku sem hér hefur verið snarað yfir á íslensku.

„Starf mitt var einfalt, að finna skít á Sigga. Sem hægt væri að nota í málinu á hendur Júlían. Gera hann ótrúverðugan. Bjartmar er hæfileikaríkur blaðamaður ef þú notar hann á réttan hátt. Og þá ekki síst ef hann er að vinna með öðrum blaðamanni. Hann gæti aldrei skrifað grein sem þessa upp á eigin spýtur.“

En af hverju varst þú þá ekki skrifaður fyrir greininni?

„Af því að ég var hluti af Wikileaks. Varðandi greinina, ég skrifaði nánast hvern staf í þessari grein. Hvað mig varðaði var hún að sextíu prósentum tilbúin. Þá sagði ég Bjartmari, jæja, nú er komið að þér. Fá Kristinn til að klára greinina. Kristinn á hluta í þessari grein þó hann starfi fyrir Wikileaks.“

Kristjón Kormákur góður penni

Hér er um býsna alvarlegar ásakanir að ræða, að Wikileaks hafi í raun ritað grein sem birtist í Stundinni sem afrakstur rannsóknarblaðamennsku. Bjartmar segir þetta hins vegar alrangt. En vissulega sé rétt að Kristjón hafi lesið yfir hluta greinarinnar.

„Sem vinur og fyrrverandi ritstjóri bað ég hann um að fara yfir orðalag að hluta og það voru mistök – greinilega.“

Bjartmar segist auðvitað hafa vitað að Kristjón var á þessum tíma í tímabundnu verkefni hjá Wikileaks. Enda hafi hann verið að þiggja upplýsingar frá Kristjóni. En að hann hafi þar með skrifað greinina sé algerlega úr vegi.

„Kristjón er mjög góður penni. Og hann sendi mér athugasemdir en það átti bara við um innganginn. En ef það er svo að ég hafi beðið vin um að prófarkalesa fyrir mig, þá er ég náttúrlega sekur.“

Varð óglatt við að sjá Sigga við legstein fórnarlambs

Spurður hvað honum þyki um þáttaröðina sjálfa segir Bjartmar þar margt ágætt en því miður sé þar einnig býsna margt rangt. Og hann skilur í raun ekki, ef þeir hafi svona mikið við grein sína að athuga, af hverju þeir spurðu þá ekki hinn „raunverulega höfund“ betur út í hana.

„Þeir benda aldrei á neinar villur í greininni minni, afsakið, greininni hans Kristjóns,“ segir Bjartmar mæðulega: „Þetta er skrípaleikur.“

Þá segir Bjartmar að honum hafi brugðið þegar hann sá Sigga sýndan í myndinni standa yfir legsteini eins fórnarlamba sinna. Siggi er dæmdur kynferðisbrotamaður gagnvart ungum drengjum. Einn þeirra svipti sig lífi. Þetta segir hann sanna að dönsku kvikmyndagerðarmennirnir hafi ekki unnið vinnu sína.

„Mér varð hreinlega óglatt. Ótrúlega ósmekklegt og ég vona innilega að fjölskylda og ættingjar hans þurfi ekki að sjá þetta. Mér fannst það út fyrir öll siðferðismörk því ég hef lesið samskiptin sem voru á milli þeirra. Þetta var rosalega ljótt að sjá.“