Móðir barnsins í haldi og málið rann­sakað sem mann­dráp

Þetta segir Grímur Grímsson, yfirlögregluþjónn hjá miðlægri rannsóknardeild lögreglu í viðtali við fréttastofu. Hann segir lögreglu hafa ágæta mynd af því sem gerðist.

„Rannsóknin beinist að því að barninu hafi verið ráðinn bani,“ segir Grímur.

Mæðginin dvalið hér í á fjórða ár

Konan sem er í haldi er móðir barnsins. Mæðginin hafa verið á landinu í þrjú til fjögur ár og njóta alþjóðlegrar verndar á Íslandi.

„Þau bjuggu saman þarna, móðir með tvö börn.“

Eldra barnið var ekki í íbúðinni

Eldra barnið var á leiðinni í skólann þegar lögreglu bar að garði á miðvikudagsmorgun og er nú í viðeigandi úrræði barnaverndaryfirvalda. Grímur segir að móðirin sjálf hafi hringt á lögreglu.

Krufning hefur farið fram en niðurstöður liggja ekki fyrir að svo stöddu.

Líkt og fram hefur komið gekkst konan undir geðmat stuttu eftir að hún var handtekin. Grímur segist ekki geta greint frá niðurstöðum þess. 

Aðspurður hvort lögregla eða barnaverndaryfirvöld hafi áður haft afskipti af konunni segist Grímur ekki vilja fara út í þau mál. 

Rannsókn miði ágætlega

Hann segir konuna samstarfsfúsa en vill ekki greina frá því hvort hún hafi játað í málinu.

„Rannsókn miðar ágætlega. Þetta er viðkvæmt mál og við höfum haldið að okkur höndum þegar kemur að upplýsingum til fjölmiðla og teljum að þær upplýsingar sem þurfa að koma séu nú fram komnar.“

Grímur segir fjölmarga hafa verið yfirheyrða í málinu.

„Í svona málum eru yfirheyrðir þeir sem þurfa þykir. Auðvitað eru lang flestir og allir með réttarstöðu vitnis nema sú sem grunuð er um verknaðinn,“ segir Grímur og bætir við að það þurfi mögulega að yfirheyra fleiri.