Markasúpa í Mílanó en West Ham er undir

Hamrarnir þurfa því að landa sigri þegar þeir taka á móti Freiburg í næstu viku en það var Michael Gregoritsch sem tryggði þýska liðinu sigurinn í kvöld, tíu mínútum fyrir leikslok. Hann skoraði þá af stuttu færi, tíu mínútum eftir að hafa komið inn á sem varamaður.

Fjörið var hins vegar mikið í Mílanó þar sem heimamenn komust í 3-1 í fyrri hálfleik, eftir að Slavi Prag varð fyrir áfalli þegar Senegalinn El Hadji Malick Diouf var rekinn af velli á 26. mínútu.

Olivier Giroud skoraði fyrsta markið skömmu síðar, þegar hann skilaði spyrnu Rafael Leao í netið, en David Doudera náði að jafna fyrir gestina með góðu, viðstöðulausu skoti utan teigs.

Hollendingurinn Tijjani Reijnders og Ruben Loftus-Cheek bættu hins vegar við tveimur mörkum fyrir Milan rétt fyrir hálfleik.

Ivan Schranz náði að minnka muninn í 3-2 en Christian Pulisic sá til þess að Milan fer með tveggja marka forskot til Tékklands.

Benfica og Rangers gerðu 2-2 jafntefli í Portúgal en Marseille er komið langleiðina í 8-liða úrslit eftir 4-0 sigur gegn Villarreal.

Seinni leikirnir fara fram eftir viku.