Bayern að finna beinu brautina á ný

Eftir þrjá tapleiki í röð í febrúar virðist lið Bayern Munchen vera að finna beinu brautina á nýjan leik. Liðið hafði ekki tapað í síðustu fjórum leikjum sínum fyrir leikinn gegn Darmstadt í dag en þarf að treyst á hálfgert hrun Leverkusen ætli liðið að eiga möguleika á þýska meistaratitlinum.

Í dag mætti Bayern botnliði Darmstadt á útivelli og var því búist við þægilegum sigri Bayern sem vann 8-1 sigur á Mainz um síðustu helgi.

Leikurinn byrjaði þó ekki vel fyrir Bæjara því Tim Skarke kom heimaliðinu yfir með marki á 28. mínútu eftir sendingu Mathias Honsak. Gestirnir voru reyndar ekki lengi að ná áttum. Jamal Musiala jafnaði metin eftir sendingu Harry Kane átta mínútum síðar og Kane kom Bayern í forystu með marki í uppbótartíma fyrri hálfleiks.

Í síðari hálfleik gengu Bæjarar síðan frá leiknum. Musiala skoraði sitt annað mark á 64. mínútu og hann lagði síðan upp fjórða mark Bayern fyrir Serge Gnabry rúmum stundarfjórðungi fyrir leikslok. Í uppbótartíma bættust tvö mörk í sarpin. Fyrst skoraði ungstirnið Mathys Tel fimmta marka Bayern áður en Oscar Vilhelmsson klóraði í bakkann fyrir heimamenn.

Lokatölur 5-2 og Bayern er núna sjö stigum á eftir Leverkusen sem er á toppnum og á leik til góða gegn Hoffenheim á heimavelli á morgun.

Úrslit dagsins í þýsku úrvalsdeildinni:

Wolfsburg - Augsburg 1-3

Heidenheim - Mönchengladbach 1-1

Mainz - Bochum 2-0

Union Berlin - Werder Bremen 2-1