Búnir að æfa vítaspyrnur og Åge búinn að velja þá sem taka vítin

Vinnist leikurinn ekki í venjulegum leiktíma eða framlengingu þá þarf að grípa til vítaspyrnukeppni.

Landsliðsþjálfarinn Åge Hareide sagði frá því í samtali við blaðamann Vísis í dag að íslenska liðið sé búið að undirbúa sig fyrir mögulega vítakeppni.  Stefán Árni Pálsson spurði norska þjálfarann út í mögulega vítaspyrnukeppni.

Norski þjálfarinn er líka búinn að ákveða það hvaða leikmenn íslenska liðsins taki vítaspyrnur.

Íslenska karlalandsliðið hefur aldrei farið í vítaspyrnukeppni í keppnislandsleik.

Albert Guðmundsson hefur verið að taka vítaspyrnur fyrir Genoa liðið í vetur og mun örugglega taka víti ef hann verður inn á vellinum. Hann hefur skorað þrjú af sex landsliðsmörkum sínum úr vítum.

Það verður aftur á móti athyglisvert að sjá hvaða leikmenn verða fyrir valinu endi leikurinn í sögulegri vítakeppni.  Sóknarmenn íslenska liðsins eru flestir ungir að árum og reynslulitlir. Á stund sem þessari þá er það oft sterkur haus og sjálfstraust sem vegur þyngra en spyrnugeta þótt hún spilli vissulega ekki fyrir.