Banda­ríkin höfða mál gegn Apple vegna ein­okunar

Forsvarsmenn fyrirtækisins eru þar að auki sakaðir um að gera notendum erfitt um vik með að færa sig yfir í snjalltæki frá öðrum fyrirtækjum.

Málið var höfðað fyrir alríkisdómstól í New Jersey í Bandaríkjunum í dag. Þetta er í þriðja sinn sem dómsmálaráðuneytið höfðar mál gegn Apple frá 2009.

„Neytendur eiga ekki að þurfa að greiða hærra verð því fyrirtæki brjóta lögin,“ sagði Merrick Garland, dómsmálaráðherra, í yfirlýsingu.

Hann segir einokun Apple á bandarískum markaði hafa þýtt hærra verð, færri valkosti og verri síma fyrir neytendur. Þar að auki hafi hún valdið skorti á nýsköpun.

Saksóknarar dómsmálaráðuneytis Bandaríkjanna hafa einni höfðað einokunarmál gegn Amazon, Google og Meta á undanförnum árum.

Wall Street Journal segir forsvarsmenn Apple hafa heitið því að berjast af hörku gegn lögsókninni. Þeir segja lögsóknina ógna fyrirtækinu og þeim grunngildum sem aðskilji vörur Apple frá öðrum á markaði þar sem þeir segja mikla samkeppni ríkja.

„Ef lögsóknin heppnast myndi hún koma niður á getu okkar til að skapa þá tækni sem fólk býst við af Apple, þar sem tækni, hugbúnaður og þjónusta mætast,“ sagði talsmaður fyrirtækisins.

Hér að neðan má sjá blaðamannafund sem haldinn var í dómsmálaráðuneyti Bandaríkjanna í dag.

Apple undir þrýstingi

Á undanförnum mánuðum hefur þrýstingur á Apple aukist víðsvegar um heiminn vegna viðskiptahátta þess, stýrikerfisins sem fyrirtækið notar og aðgengi að því. Framkvæmdastjórn Evrópusambandsins sektaði fyrirtækið nýverið um 270 milljarða á grundvelli einokunar þess á sviði tónlistarstreymis.

Sjá einnig: Apple sektað um 270 milljarða af ESB

Forsvarsmenn Apple hafa lengi varist ásökunum um að þeir komi í veg fyrir aðgengi annarra fyrirtækja að stýrikerfi þeirra á þá vegu að takmarkað aðgengi sé lykilatriði í því að koma í veg fyrir að vírusar og svikaforrit rati þar inn.