Dag­skráin í dag: Valur og Breiða­blik mætast í úr­slitum, enska B-deildin og LUÍH

Stöð 2 Sport

Valur og Breiðablik mætast í úrslitum Lengjubikars kvenna í knattspyrnu klukkan 12.50. Um er að ræða þau tvö lið sem hafa barist á toppi deildarinnar undanfarin ár og stefnir í enn eitt einvígið í ár.

Klukkan 19.20 er LUÍH, Lengsta undirbúningstímabil í heimi, á dagskrá. Í þáttunum heimsækir Baldur Sigurðsson lið í Bestu deild karla og fer yfir undirbúningstímabilið hjá þeim.

Klukkan 20.00 er Körfuboltakvöld á dagskrá. Þar verður farið yfir 21. umferð Subway-deildar karla í körfubolta.

Stöð 2 Sport 2

Klukkan 19.55 er leikur Lille og Lens í Ligue 1 í Frakklandi á dagskrá. Landsliðsmaðurinn Hákon Arnar Haraldsson leikur með Lille sem situr í 4. sæti deildarinnar með 43 stig, fjórum stigum á eftir Brest í 2. sæti.

Stöð 2 Sport 4

Klukkan 22.00 er Ford Championship-mótið í golfi á dagskrá. Það er hluti af LPGA-mótaröðinni.

Vodafone Sport

Klukkan 12.25 er leikur Bristol City og Leicester City í ensku B-deildinni á dagskrá. Refirnir eru í harðri baráttu um að komast aftur upp í ensku úrvalsdeildina eftir að hafa fallið úr deild þeirra bestu á síðustu leiktíð.

Klukkan 14.55 er komið að leik Norwich City og Plymouth Argyle í sömu deild. Klukkan 17.25 er svo leikur Blackburn Rovers og Ipswich Town á dagskrá. Heimamenn eru í fallbaráttu á meðan Ipswich er að berjast á toppi deildarinnar. Arnór Sigurðsson leikur ekki meira með Blackburn á leiktíðinni eftir að verða fyrir meiðslum í leik Íslands og Ísraels nýverið.

Watford tekur svo á móti Leeds United í síðasta leik dagsins í ensku B-deildinni. Leikurinn hefst klukkan 20.00.

Klukkan 01.30 er New South Wales Womens Open-mótið í golfi á dagskrá. Það er hluti af LET-mótaröðinni.