Marka­súpa þegar Liver­pool komst á sigur­braut

Eftir að hafa mistekist að vinna síðustu tvo deildarleiki sína þá vann Liverpool 4-2 sigur á Tottenham Hotspur í dag. Um var að ræða fjórða tap Spurs í röð í ensku úrvalsdeild karla í fótbolta.

Heimamenn byrjuðu af krafti og voru komnir yfir eftir rúmlega stundarfjórðung þegar Mohamed Salah skilaði knettinum í netið eftir undirbúning Cody Gakpo. Það var svo vinstri bakvörðurinn Andrew Robertson sem tvöfaldaði forystuna skömmu fyrir hálfleik og staðan 2-0 þegar liðin gengu til búningsherbergja.

Það voru aðeins fimm mínútur liðnar af síðari hálfleik þegar Gakpo skoraði þriðja mark Liverpool eftir undirbúning Harvey Elliott. Sá síðarnefndi skoraði svo fjórða markið níu mínútum síðar eftir undirbúning Salah.

Það benti lítið til þess að gestirnir myndu gera þetta að alvöru leik en Richarlison minnkaði muninn á 72. mínútu og lagði upp mark fyrir Son Heung-Min fimm mínútum síðar. Nær komust gestirnir ekki og þó Salah hafi skilað boltanum í netið í uppbótartíma þá lauk leiknum með 4-2 sigri Liverpool þar sem markið var dæmt af.

Liverpool er nú í 3. sæti með 78 stig þegar tvær umferðir eru eftir. Liðið á enn möguleika á að verða Englandsmeistari en þeir eru þó litlir þar sem Arsenal er með 83 stig og Manchester Cit með 82 og leik til góða.

Meistaradeildardraumar Tottenham fara þverrandi. Líðið er í 5. sæti með 60 stig, sjö stigum á eftir Aston Villa sem hefur leikið einum leik meira.