Styttir upp í kvöld

Í morgunsárið er lægð rétt suður af landinu og því er norðaustlæg eða breytileg átt í dag. Vindur er á bilinu fimm til þrettán metra á sekúndu og er hvassast við suðausturströndina og á Vestfjarðakjálkanum.

Nokkur úrkoma fylgir lægðinni og rignir á öllu landinu en í kvöld styttir að mestu upp. Þetta kemur fram í hugleiðingum veðurfræðings hjá Veðurstofu Íslands.

Fyrst styttir upp vestanlands en undir miðnætti verður orðið úrkomulítið í öllum landshlutum. Norðaustanvindurinn ber með sér svalt loft og norðaustantil er útlit fyrir hita á bilinu þriggja til fimm stiga en annars verður hiti yfirleitt um tíu stig.

Á morgun er svo spáð fremur hægri breytilegri átt víðast hvar með skúrum eða rigningu en yfirleitt bjart á norðaustanverðu landinu. Hiti verður á bilinu átta til fjórtán stiga.

Veðurhorfur næstu daga:

Á fimmtudag:

Fremur hæg breytileg átt. Skýjað og dálítil væta, en að mestu þurrt norðan- og austanlands. Hiti 6 til 12 stig.

Á föstudag:

Norðaustlæg átt 5-13 m/s, hvassast syðst og súld eða rigning með köflum. Hiti 5 til 13 stig, hlýjast sunnanlands.

Á laugardag:

Suðlæg átt, víða 3-8 m/s og súld eða rigning með köflum, en úrkomulítið norðaustantil. Hiti 8 til 16 stig, hlýjast á Norðausturlandi.

Á sunnudag:

Suðvestlæg átt, 5-13 m/s og skúrir en að mestu þurrt austanlands. Hit breytist lítið.

Á mánudag:

Útlit fyrir suðlæga átt með rigningu.

Á þriðjudag:

Líklega sunnan og suðvestan átt með skúrum eða rigningu en bjartviðri norðaustanlands.