Fimm ár fyrir til­raun til mann­dráps á að­fanga­dag

Dómurinn var kveðinn upp í Héraðsdómi Reykjaness í dag.

Ásgeir var ákærður fyrir tilraun til manndráps, húsbrot, hættubrot og vopnalagabrot. Tveir aðrir voru dæmdir fyrir að aðstoða Ásgeir, annar þeirra m.a. fyrir að brjótast inn með honum og hinn fyrir að aka þeim til og frá vettvangi.

Segist hafa ætlað að hræða föðurinn

Ákærði, Ásgeir Þór Önnuson sagði að tilgangurinn með innbrotinu hefði verið að ógna og lemja föðurinn, sem Ásgeir sagðist reyndar ekki hafa þekkt. Hann vildi ekki segja hvers vegna hann hefði ætlað að gera það.

Ásgeir sagði í skýrslutöku lögreglunnar að þegar hann hefði komið inn í íbúðina, hafi hann heyrt rödd inni í herbergi, miðað á vegginn og hleypt af skotum. Ætlunin hafi ekki verið að skjóta á manneskju og þar með ekki á litla stúlku. Ætlunin hafi einungis verið að hræða föðurinn.

Ásgeir sagðist ekki hafa vitað hvað hann ætti að gera við byssuna þegar hann var búinn að skjóta, þannig hann hafi hent henni frá sér. Lögreglan fann skammbyssuna á snæviþöktum grasbletti skammt frá húsinu þegar hún kom á vettvang.

Breki Þór, meðákærði sem braust með Ásgeiri inn í íbúðina, sagðist hafa vitað að hann hefði aðeins ætlað að hræða föðurinn með byssunni, og ef til vill berja hann aðeins.

Var að opna pakka þegar þeir brutust inn

Stúlkan, sem var níu ára, gaf skýrslu fyrir dómi í Barnahúsi 9. janúar 2024. Þar sagði hún að hún hefði verið að fara út úr sínu herbergi í íbúðinni, þar sem hún hafði verið að sækja skæri til að opna pakka, þegar hún hafi séð menn, reyk og glerbrot á gólfinu. Hún sagði að einn maðurinn hefði verið með byssu, og hann hafi byrjað að skjóta.

Faðir stúlkunnar hafi svo gripið barnið, haldið utan um það, og verið eins og varnarskjöldur í horninu á herberginu. Barnið kvaðst hafa orðið verulega hrætt og verið að í marga daga.

„Hending ein“ að ekki hafi farið verr

Ekkert skotanna hafnaði í stúlkunni eða föðurnum, en stúlkan hlaut eymsli í andliti eftir að óþekkt brak hafnaði í andliti hennar í kjölfar þess að eitt skotið hafnaði á hörðum fleti.

Í dómnum kemur fram að Ásgeir hafi ekki verið með skotvopnaleyfi, og því verið óvanur að skjóta af byssu. Um hafi verið að ræða mjög öfluga byssu, og þótti því líklegt að hann hafi ekki haft fullt vald á byssunni þegar hann skaut. „Hending ein“ hafi ráðið því hvar skotin lentu.

Breki Þór var ákærður fyrir hlutdeilt í brotum Ásgeirs Þórs, með því að hafa liðsinnt honum við undirbúning og framkvæmd brotsins. Hann hafi m.a. greitt ökumanni, þriðja meðákærða, 80.000 krónur fyrir að aka með þá að heimilinu, aðstoðað við að skipta um númeraplötur á bifreiðinni, og síðan ruðst með Ásgeiri í heimildarleysi inn á heimilið.

Málið er höfðað á hendur þriðja ákærða fyrir hlutdeild í broti Ásgeirs með því að hafa tekið að sér að aka með meðákærðu gegn greiðslu. Hann hafi ekið með meðákærðu áleiðis eftir Krýsuvíkurvegi og að Krýsuvíkurkirkju eftir að skotárásinni lauk, þar sem meðákærðu yfirgáfu bifreiðina. Hann hafi svo sett rétt skráningarnúmer aftur á bifreið sína áður en hann ók á brott.

Fimm ára fangelsisdómur

Ásgeir Þór Önnusön var dæmdur í fimm ára fangelsi, Breki Þór Frímannsson í þrjátíu mánuði og ökumaðurinn hlaut eins árs fangelsisdóm. Gæsluvarðhald sem mennirnir hafa sætt vegna málsins verður dregið frá refsingunni

Gerð var upptæk Colt-skammbyssa gerð fyrir 45 kalíbera skot.

Ásgeir og Breki voru dæmdir til að greiða stúlkunni tvær milljónir króna auk vaxta, og föðurnum eina og hálfa milljón auk vaxta. Þeim var einnig gert að greiða húseigendum heimilisins í Hafnarfirði, afa og ömmu stúlkunnar, hvoru um sig eina milljón króna auk vaxta.