Hér má sjá stiklu fyrir Velkom Yn:
„Þetta er bæði grín og hryllingsleiksýning skrifuð og leikstýrð af mér. Mig hefur lengi langað til að búa til eitthvað með vampírum og er mjög ánægður með að fá að setja upp vampíru-splatter í leikhúsi. Ég fékk mikið vampíruæði fyrir nokkrum árum og það mætti segja að þetta hafi verið besta útrásin.“
Egill Gauti er sömuleiðis meðlimur danssveitarinnar Inspector Spacetime og hefur komið víða að í listinni.
„Ég er búinn að vera í sviðshöfundanámi í LHÍ síðastliðin þrjú ár ásamt því að vera í hljómsveitinni og ég útskrifaðist svo núna í vor. Mér finnst mjög gaman að flakka á milli listforma og gera bara það sem ég er spenntastur fyrir á hverri stundu. Ég mun þó líklega einbeita mér að tónlistinni í smá tíma eftir þetta,“ segir hann.
Þessi vampírusýning er stjörnum prýdd og fer Kristinn Óli, jafnan þekktur sem Króli, meðal annars með hlutverk ásamt Hólmfríði Hafliðadóttur, Sölva Dýrfjörð, Birtu Sólveigu Söring og Helgu Salvör Jónsdóttur.
„Þetta er einskonar ástaróður til goðsagnarinnar og ég dró innblástur frá mörgum mismunandi formum vampírunnar. Sýningin gerist á einu kvöldi þar sem þrjár manneskjur skrá sig inn á gistiheimili sem rekið er af tveimur vampírum. Ég lofa miklu blóði.“
Sýningin er sett upp í samstarfi við Afturámóti sem hafa breytt Háskólabíói í leikhús yfir sumarið. Hún fer fram á morgun og á miðvikudaginn, 9. og 10. júlí en nánari upplýsingar má finna hér.
„Mér finnst smá fullkomið að setja upp vampírusýningu í húsnæði sem var áður bíó,“ segir Egill Gauti að lokum.
