Skemmtilegur golfvöllur í einstaklega fallegu umhverfi

Golfvöllur vikunnar 7. ágúst 2024 08:30

Húsafellsvöllur er 9 holu völlur sem liðast um fjölbreytt landslag meðfram bökkum Kaldár og Stuttár í jaðri sumarhúsasvæðisins. Húsafellsvöllur er golfvöllur vikunnar á Vísi. Myndir/Helga Golfklúbbnum Húsafelli.

Húsafellsvöllur er af mörgum talin vera ein af földum perlum Vesturlands en hann er 9 holu völlur sem liðast um fjölbreytt landslag meðfram bökkum Kaldár og Stuttár í jaðri sumarhúsasvæðisins. Fagurgrænn birkiskógurinn, Eiríksjökull, Langjökull, Okið, Hafursfell og Strútur eru glæsilegir á að horfa og mynda til samans einstaklega fallegt umhverfi sem lætur engan ósnortinn.

Í sumar ætlum við að kynnast nokkrum af þeim fjölda spennandi golfvalla sem hægt er að finna víða um land og gaman væri að prófa í sumarfríinu en hægt er að leika golf á yfir 60 völlum hér á landi. Húsafellsvöllur er golfvöllur vikunnar á Vísi.

Húsafellsvöllur, séð frá 9. holunni. Völlurinn er af mörgum talin vera ein af földum perlum Vesturlands.

Helsta einkenni Húsafellsvallarins er að flestar brautir hans liggja meðfram Kaldá og Stuttá og slá þarf yfir vatn á 9. holunni. Engar sandglompur eru á Húsafellsvelli en kringum völlinn má finna hraun og skóg og því má segja að þar sé að finna nægar áskoranir. Síðan má ekki gleyma hinu svokallaða „Húsafellsgati“ en það er oft sól og blíða í Húsafelli þótt það sé sólarlaust og vindur í næsta nágrenni.

Golfklúbbur Húsafells var stofnaður árið 1996 og verður því 30 ára eftir tvö ár. Eftir að hafa legið í dvala í nokkur ár tók hópur velunnara hans höndum saman, í samvinnu við stjórnendur í Húsafelli, og endurvöktu starfsemina.

Útsýnið frá golfvellinum er afar fallegt. Hér má sjá Strút, Eiríksjökull og Hafursfell.

Um 65 félagsmenn eru í klúbbnum og eru þeir duglegir að spila á vellinum. Einnig er alltaf að aukast að vinahópar komi í „golfferð“ og gisti á Hótel Húsafelli eða á tjaldstæðinu. Erlendir ferðamenn, sem gista á hótelinu, eru einnig margir spenntir fyrir golfvellinum og taka hring af og til.

Fólk á öllum aldri spilar golf í Húsafelli.

Eftir hring er vinsælt að kíkja í mat og drykk á Bistróinu sem er rétt við völlinn en um er að ræða notalegan veitingastað sem býður upp á hádegisverðarhlaðborð og à la carte matseðil yfir sumartímann. Einn er tilvalið að fá sér drykk á Hótel Húsafelli eftir skemmtilegan hring.

Húsafellsvöllur er hannaður af Hannesi Þorsteinssyni golfvallaarkitekt. Völlurinn er par 72 og inniheldur 5992 metra af gulum teigum og 4110 metra af rauðum teigum.

Fjölbreytt ferðaþjónusta er í boði í Húsafelli. Þar má nefna afþreyingarlaugina Lindina sem er alltaf jafn notalegt að heimsækja og Giljaböð sem eru dásamleg hálendisslökun í einstöku landslagi. Í nágrenni Húsafells eru einnig fallegar gönguleiðir og ís- og hraunhellar.

Golf Golfvellir