Heitavatnsleysið: Flykktust í sund og sluppu við upp­vaskið með grill­veislu

Íbúar tóku þessu raski af æðruleysi, margir nýttu sér sturtuaðstöðu sundlauga Reykjavíkur og gamla fólkið skellti sér í grillveislu með útilegu ívafi.

Breiðholt er eitt þeirra hverfa sem er og verður heitavatnslaust til hádegis á morgun. Þar er unnið hörðum höndum að því að tengja Suðuræð 2 við Suðuræð 1 sem er flutningslögn fyrir heitt vatn frá virkjunum.

Sólrún Kristjánsdóttir, framkvæmdastýra hjá Veitum, segir að framkvæmdir séu á áætlun og viðurkennir að þeim fylgir talsvert rask fyrir íbúa á þeim svæðum sem undir eru.

„Já, þetta eru að sjálfsögðu óþægindi og mér finnst samt alveg frábært að finna þann skilning sem við höfum fengið. Við erum í rauninni að veita þessum lífsgæðum – sem heita vatnið okkar er – til höfuðborgarsvæðisins. Það er bara komið að þeim tímapunkti núna að eftirspurnin er orðin það mikil eftir þessum lífsgæðum, að þjóna stækkandi samfélagi, að við þurfum að auka flutningsgetuna.“

Hafið þið frétt af einhverjum skemmdum?

„Við höfum heyrt af því að einhverjir ofnalekar hafi komið upp en við vitum ekki hvort þeir tengist beinlínis þessu en við getum samt alveg sagt að þetta sé ákveðið álagspróf að taka svona stórt kerfi úr notkun og setja það svo aftur í notkun. Það er alveg viðbúið að það komi upp rekstrartruflanir og jafnvel einhverjar bilanir.“

Til stendur að ljúka verkinu í hádeginu á morgun en heita vatninu verður hleypt á hægt og rólega. Á heimasíðu Veitna má sjá tímasetningu eftir hverfum.

Fólk flykktist í Laugardalslaug til að komast í bað

Í ljósi þess að þriðjungur þjóðarinnar kemst ekki í sund í sínu hverfi þá er kannski ekki skrítið að fólk hafi í dag tekið að flykkjast í sundlaugar í Reykjavík.

Guðný Björk Halldórsdóttir vaktstjóri í Laugardalslaug hafði gleymt heitavatnsleysinu og var undrandi á gríðarlegri aðsókn í laugina í morgun.

„Ég og besta vinkona mín byrjuðum í afgreiðslunni í morgun og vanalega er þetta svo kósí á morgnanna, allir fastagestirnir kunna þetta og allt voða næs en svo hefur bara verið brjálað að gera síðan við opnuðum,“ útskýrir Guðný.

Margir borguðu sig inn í laugina til að komast í sturtuaðstöðuna. Nokkrir eldri borgarar úr öðrum hverfum voru hissa á að þurfa að taka upp veskið þegar þeir mættu í afgreiðsluna í Laugardalslauginni í morgun.

„Við erum nýbyrjuð að rukka og það eru ekkert allir voðalega sáttir við þetta.“

Komu sér hjá uppvaski með því blása til grillveislu

Starfsfólk Hrafnistu hugsaði með sanni út fyrir kassann þegar það frétti af heitavatnsleysinu og ákvað að bjóða til grillveislu með útileguívafi í hádeginu, en þannig komst fólk hjá því að fást við mikið uppvask.

Árdís Hulda Eiríksdóttir, forstöðukona Hrafnistu, segir framkvæmdirnar vissulega setja ákveðna rútínu úr skorðum hjá íbúum Hrafnistu en þau hafi ákveðið að gera gott úr málunum.

„Við reynum bara að bregðast við á jákvæðan hátt og leysa málin. Við báðum um gott veður og vorum bænheyrð. Þetta yndislega veður breytir öllu og þetta er ekkert mál,“ segir Árdís, hæstánægð með grillveisluna.