Sig­ríður segir hátt­semi Helga Magnúsar ekki sæmandi em­bætti ríkis­sak­sóknara

Í greinargerð á vef Ríkissáttasemjara rekur Sigríður Friðjónsdóttir málið aftur til þess þegar dómsmálaráðuneytið fyrir hönd þáverandi dómsmálaráðherra hafi skrifað embættinu í ágúst fyrir tveimur árum og spurt til hvaða viðbragða ríkissaksóknari hygðist grípa vegna ummæla Helga Magnúsar Gunnarssonar vararíkissaksóknara á opinberum vettvangi.

Ráðuneytið hafi áréttað: „mikilvægi þess að embætti ríkissaksóknara njóti bæði virðingar og trausts almennings og að hafið sé yfir vafa að við meðferð mála hjá embættinu sé hvers kyns mismunun og hlutdrægni hafnað. Þá kom fram að ráðuneytið teldi mikilvægt að siðareglur ákærenda væru í heiðri hafðar. Áréttað var að ríkissaksóknari er næsti yfirmaður vararíkissaksóknara og að það væri ríkissaksóknara að ákveða til hvaða viðbragða embættið gripi gagnvart honum."

Í framhaldinu áminnti Sigríður Helga Magnús. ....„með tjáningu sinni, ummælum og orðfæri í opinberri umræðu, á samfélagsmiðlinum Facebook, hafi háttsemi vararíkissaksóknara utan starfs hans verið ósæmileg og ósamrýmanleg starfinu og að sú háttsemi hafi varpað rýrð á störf hans sem vararíkissaksóknari, á embætti ríkissaksóknara og ákæruvaldið almennt.“

Helgi Magnús viðurkennir ekki að Sigríður hafi heimild til að áminna hann.

„Þetta snýst nú reyndar um veitingarvaldið ekki verkstjórnina. Það er alveg óumdeilt að það er dómsmálaráðherra sem veitir stöðuna og það er dómsmálaráðherra sem veitir lausn frá stöðunni. Áminning er liður í lausn frá störfum. Ég tel að dómsmálaráðherra hafi einn hafi heimild til að veita áminningu, sem er þá undanfari lausnar frá störfum,“ segir Helgi Magnús.

Ríkissaksóknari segir: „Vararíkissaksóknari bætti ekki ráð sitt í kjölfar áminningarinnar. Þvert á móti voru ummæli hans og orðfæri í opinberri umræðu, í starfi hans sem vararíkissaksóknari, einkum í júlí 2024, enn og aftur með þeim hætti að hann sýndi af sér háttsemi sem er ósæmileg og ósamrýmanleg starfi hans,“ ... „Ummæli vararíkissaksóknara beindust m.a. að innflytjendum og flóttafólki, einkum frá Miðausturlöndum,“ segir í greinargerð Sigríðar.

Á þessum tíma hafi úrræði ríkissaksóknara gagnvart Helga Magnúsi verðið tæmd. Mál hans hafi því verið sent dómsmálaráðuneytinu, þar sem það bíður enn úrskurðar ráðherra. Samkvæmt heimildum fréttastofunnar er ekki reiknað með úrskurði ráðuneytisins í þessari viku.

Þess vegna spyr ég þig, finnst þér allt það sem þú hefur sagt ekki varpa neinum skugga á embættið og kalli ekki á neitt vantraust á þig sem saksóknara eða ríkissaksóknaraembættið í heild sinni varðandi óhlutdrægni í málum sem varða tiltekna einstaklinga og hópa?

„Ég hafna því náttúrlega að það hafi einhver áhrif á hlutdrægni eða óhlutdrægni. En ég get alveg viðurkennt að það hefði mátt orða hlutina betur og kannski var ég hvass í einhverjum af þessum tilvikum sem þú ert að vitna til. En að hluta til er þetta bara oftúlkað og stílfært sem ég var að segja. En að gefa sér að það liggi eitthvað meira í orðunum en þar er sagt í sumum tilvikum. En ég get alveg viðurkennt að ég hefði getað orðað hlutina betur og kannski var sumt af þessu hvasst en ég er ekki sammála því að almenningur geti ekki borið traust til starfa minna. Mér finnst það alveg fráleitt,“ segir Helgi Magnús Gunnarsson.