Í fréttum Stöðvar 2 var sýnt brot úr þættinum. Þar var farið var á fund með „sexunum“ en þær hittast venjulega einu sinni í mánuði. Nafn hópsins vísar til DC 6-flugvélanna, sem Flugfélagið rak. Það eru þó fleiri tegundir sem þær halda upp á.
„Mér fannst voða gaman að þristi af því að ég fékk einu sinni að stýra,“ sagði Inga Norðdahl en bætti snarlega við að það hafi ekki mátt.
Þær Guðný Jónasdóttir og Bryndís Guðmundsdóttir sögðu þó að Fokkerinn hefði verið mikið betri. Þá nefndi Guðný að Viscountinn hefði verið ljúfur.
„Og vaggaði svo mikið, mjúkur. Mjög gaman að fljúga á honum,“ sagði Guðný.
Þær voru fyrsta kynslóð íslenskra flugfreyja sem fór á þotu. Þegar við spurðum hópinn hverjar hefðu farið á Þotuna, með stórum staf, réttu allar upp hönd. Sögðust meira að segja hafa mætt út á Reykjavíkurflugvöll daginn sem hún kom í júní 1967.
Inga Norðdahl rifjaði upp sögu af því hvernig orðheppin starfssystir skilaði skömminni til dónans. Það hafi verið í flugi til Mallorca.
„Það er einn karl í gangsæti sem klípur hana í afturendann. Og hún snýr sér svona við, beint að manninum, og þá fær hún athygli allra í kring: „Það er bannað að klípa í rassinn á flugfreyjunum.“.“
Og bætti við að viðkomandi hefði lippast niður í sæti sitt og ekki sést það sem eftir lifði ferðar.
„Þetta var yndislegur tími. Ég var ekki tilbúin að hætta 67 ára. Ég var bara í banastuði að halda áfram,“ sagði Kristín Bernhöft.
Fjallað var um sögu Flugfélags Íslands frá 1937 til 1973 í öðrum þætti Flugþjóðarinnar á Stöð 2 í kvöld. Áskrifendur Stöðvar 2 og Stöðvar 2+ geta séð þáttinn í streymisveitu Stöðvar 2.
Í þriðja þætti, mánudagskvöldið 16. september, verður fjallað um sögu Loftleiða. Hér má sjá kynningarstiklu þáttaraðarinnar:
