Ætlar í blómabað á Balí með manninum sínum

Svava Marín Óskarsdóttir skrifar 27. september 2024 07:00

Camilla Rut sýnir lesendum Vísis hina hliðina þessa vikuna. Vísir/Vilhelm Gunnarsson

„Ég vil meina að ég hafi að einhverju leyti „alist upp“ á samfélagsmiðlum, hleypt fólki nálægt mér og talað um hlutina nákvæmlega eins og þeir eru,“ segir Camilla Rut Rúnarsdóttir áhrifavaldur og verkefnastjóri.

Camilla Rut er þrítug, búsett á Seltjarnarnesi með unnusta sínum Valgeiri Gunnlaugssyni pítsabakara og eiganda Pizza 107, og þremur sonum. Hún segir ekkert dýrmætara en að vera í núinu, huga að börnunum og heimilinu ásamt því að blómstra í vinnunni.

Camilla Rut sýnir lesendum Vísis hina hliðina þessa vikuna.

Fullt nafn? Camilla Rut Rúnarsdóttir

Aldur? 30 ára, thirty flirty and thriving eins og skáldið sagði.

Starf? Verkefnastjóri markaðsmála og stafrænna miðla.

Fjölskylduhagir? Trúlofuð pizzabakara með þrjá gríslinga.

Lýstu sjálfri þér í þremur orðum:

Umhyggjusöm, einlæg og hnyttin.

Hvað er á döfinni? Er nýbúin að halda upp á þrítugsaldurinn en ég er rosalega mikið að þyggja haustið og rútínuna núna, á döfinni er að gæla við að byrja að gera efni fyrir samfélagsmiðlana mína aftur með öðru móti en ég hef gert áður.

Þín mesta gæfa í lífinu? Börnin mín tvö, bónus barnið sem fylgdi ástmanninum mínum og fólkið sem hefur raðast óvænt inn í líf mitt undanfarið.

Mér finnst ég svo heppin

Hvað sérðu þig eftir tíu ár? Fertug, í toppmálum að baða mig í blóma baðkari á balí með manninum mínum. Þá verða strákarnir okkar 20, 19 og 15 ára svo þeir geta staðið vaktina á pizzastaðnum okkar á meðan.

Hvað viltu upplifa áður en þú deyrð? Fallhlífastökk.

Ertu með einhvern bucket-lista? Já já þar eru mis einfaldir og mis gáfulegir hlutir sem má deila um.

Besta heilræði sem þú hefur fengið? „Þetta er ekki svona flókið“ og þetta klassíska með að „þetta reddast alltaf“.

Hvað hefur mótað þig mest? Ætli það sé ekki í grunninn þrautagöngurnar og verkefnin sem lífið hefur gefið mér. Að standa sterk í lappirnar með höfuðið hátt eftir það sem á dynur er eitthvað sem hefur mótað mig mikið og gefið mér kraft.

Hvað gerirðu til að endurhlaða batteríin? Dansa við góða tónlist, þó það sé ekki nema Macarena með strákunum mínum í eldhúsinu heima.

Uppskrift að drauma sunnudegi? Að vakna við kaffibolla uppí rúm og knús frá ástmanninum, þegar ég segi kaffibolla þá meina ég ískaldann og sykurlausann Red bull því ég er bara þannig og skammast mín ekkert fyrir það, en í kjölfarið myndi ég vilja fara í brunch með góðu eggs benedict og rölta um í góðu veðri í miðbænum. Þetta er auðvitað allt tengt því að börnin séu í góðu skapi og njóta með mér.

Uppáhalds staðurinn á heimilinu? Svefnherbergið mitt er griðarstaðurinn, annars eldhúsið.

Fallegasti staður á landinu? Hellishólar í Fljótshlíð.

En í heiminum? Ég á eftir að skoða heiminn meira, svara þér betur seinna.

Hvað er það fyrsta sem þú gerir þú vaknar? Gríp mér ískaldann sykurlausan Red Bull á meðan ég smyr nesti fyrir börnin, byrja daginn vel!

En það síðasta sem þú gerir áður en þú ferð að sofa? Skrolla TikTok, ekki dæma. Við höfum öll okkar galla!

Hugarðu að heilsunni, þá hvernig? Ég reyni eins og ég get að næra mig vel og reglulega, grænt te og hreyfa mig. Ég var ofboðslega öflug í hreyfingunni að lyfta lóðum og stunda skemmtilega tíma en það hefur aðeins setið á hakanum vegna anna undanfarið svo ég er að leita mér að einhverju skemmtilegu til að byrja í núna.

Elskar að afgreiða pizzur

Hvað ætlaðir þú að verða þegar þú yrðir stór? Búðarkona, ég fæ mikla útrás fyrir þeirri hlið af mér þegar ég býð mig fram í afgreiðsluna á pizzastaðnum okkar. Elska það!

Hvenær fórstu að gráta síðast og af hverju? Það er hollt að gráta. En ég fór síðast að gráta í fyrradag því ég var þreytt, ég verð algjör vælukjói ef ég sef illa.

Ertu A eða B týpa? Ég er í grunninnn B týpa sem virkar svo sem ekki vel með þrjú börn og vinnu, ástmaður minn er að reyna að kenna mér að vera A týpa um þessar mundir en það gengur misvel.