„Agla María hélt liðsfund eftir þann leik og hvatti liðið á­fram“

Blikar héldu út, markalaust jafntefli varð niðurstaðan gegn Val, sem dugði til að lyfta titlinum.

„Ég er orðlaus. Þetta var stórkostlegur leikur, bæði lið fengu fín færi og jafntefli held ég að hafi verið sanngjörn niðurstaða. Fyrsta jafnteflið hefði ekki getað komið á betri tíma,“ sagði Nik í viðtali við Gunnlaug Jónsson á Stöð 2 Sport beint eftir leik.

Nik tók við þjálfun Breiðabliks fyrir ári síðan. Þá var liðið í slæmri stöðu og langt frá því að berjast um titilinn.

„Það hefur verið frábært, við höfum lagt svo hart að okkur og notið góðs stuðnings allan tímann. Komumst í bikarúrslit líka [gegn Val] en urðum fyrir vonbrigðum. Agla María hélt liðsfund eftir þann leik og hvatti liðið áfram fyrir lokasprettinn. Við ætluðum okkar að verða Íslandsmeistarar og það tókst!“

„Þess vegna kom ég [til Breiðabliks]. Ég er búinn að vera með mynd af titlinum í huga í heilt ár og núna er hann okkar. Við erum meistarar og ætlum okkur meira á næsta tímabili.“

Lokamínútur leiksins voru æsispennandi. Staðan markalaus og Breiðablik dugði jafntefli. Liðið lagðist langt til baka og hélt út til enda.

„Ekkert svo [stressandi]. Við glímdum vel við fyrirgjafirnar og stelpurnar lögðu inn svo mikla vinnu. Allar sem ein að verjast saman. Við vissum að Valur gæti sært okkur en við gerðum ótrúlega vel. Ég hafði aldrei áhyggjur, vissi að stelpurnar myndu sigla þessu heim,“ sagði Nik að lokum.