„Þetta er saga af villi­götum“

„Þetta er saga, saga af villigötum, af því þegar þú ert á vitlausri leið en nærð svo loksins að finna ljósið,“ segir Ísak Dagur Kristjánsson, tónlistarmaðurinn SAKI í samtali við Vísi. Hann segist lengi hafa unnið í plötunni, síðastliðið eina og hálfa árið. Plötuna hefur hann gert ásamt félaga sínum Snorra Péturssyni sem fram kemur í nokkrum lögum. Á plötunni eru níu lög og er hún sett upp á ákveðinn hátt til að koma sögunni til skila.

Sækir innblástur í eigin tilfinningar

„Ég lagði ekki upp með það að hafa þetta svona, þetta var ekki planað. Ég ákvað þetta í raun bara allt saman í lokin, þá fattaði ég hvernig ég gæti lagt lögin upp á plötunni til þess að segja þessa sögu. Þetta er sönn saga, þó sumt sé ýkt, þá er þetta allt eitthvað sem varð mér raunverulegur innblástur,“ útskýrir Ísak.

Hann segist sækja mikið í tónlist þegar honum líði illa. Með því að semja tónilist fái hann útrás fyrir tilfinningar sínar. Ísak segir að honum finnist því eðli málsins samkvæmt vænt um lögin á plötunni.

„Þau minna mig auðvitað á þennan tíma. Hvert lag hefur sína sögu fyrir mér og sína merkingu. Eitt af þeim byrjaði ég að semja í fyrra, lagið „Missa vitið.“ Svo kláraði ég það ekki fyrr en í ár og þá var það komið með nýja meiningu fyrir mér, sem er kannski eitthvað sem ég vil ekki endilega deila.“

Ísak segist fyrst og fremst vera sáttur á þessum tímamótum, að hafa loksins gefið út sína fyrstu plötu. Með plötunni fylgir tónlistarmyndband við lagið Missa vitið en því er leikstýrt af Magnúsi Rönne. „Ég hlakka til að leyfa fólki loksins að sjá það, við lögðum alvöru vinnu í þetta.“

Hann segist engan veginn hættur. Hann einbeiti sér nú að því að fylgja þessari plötu úr hlaði en segist strax byrjaður að semja lög á þá næstu. „Ég er með nokkur í bígerð og vonast til þess að gefa þau út á næsta ári.“