Frum­sýning á Vísi: Villi Vill fer á kostum í tónlistarmyndbandi Luigi

Logi er heldur betur landsmönnum kunnur bæði í landsliðinu þar sem hann hefur farið mikinn, skorað mikilvæg mörk og verið hetja liðsins en líka á sviði tónlistarinnar þar sem hann hefur gefið út hvern smellinn á fætur öðrum sem Lugi. Logi er vant við látinn í atvinnumennskunni í Noregi þar sem hann spilar með Stromsgodet og átti erfitt með að finna tíma með félaga sínum og kollega Eyþóri Wöhler í að gera tónlistarmyndband.

Berglind Rut Wöhler leikstýrði myndbandinu, Vetur Music framleiddi, Kristinn Gauti Gunnarsson stýrði myndatöku. Sigurjon Thor stýrði eftirvinnslu og sá Elísabet Oktavía um stílíseringu.

Báðir fætur á jörðinni en Villi himinlifandi

„Ég bý auðvitað í Noregi og er að spila þar, svo er maður í landsliðsverkefnum þannig það hefur reynst þrautin þyngri að finna tíma til þess að taka upp myndband, maður getur víst ekki skotist heim þegar maður vill,“ segir Logi léttur í bragði í samtali við Vísi.

Hann segist hafa sótt innblástur að myndbandinu til kanadískra kollega sinna þeirra Justin Bieber og Drake sem gerðu svipaða hluti í tónlistarmyndbandinu við lagið Popstar með DJ Khaled á sínum tíma. Logi segir að lögmaðurinn knái hafi ekki hugsað sig tvisvar um áður en hann sló til.

„Villi vildi eiginlega ekki hætta þegar tökurnar voru búnar. Hann hefði verið klár í að hafa þetta miklu lengra, enda stóð hann sig með prýði og ég er hæstánægður með hann,“ segir Logi hlæjandi. Norska deildin klárast 1. desember og kemur Logi þá heim. Hann segir að þá muni öll hans einbeiting fara í að undirbúa útgáfutónleikana í Gamla bíó sem fara fram þann 22. desember. Vilhjálmur H. Vilhjálmsson eða Villi Vill er hæstánægður með sitt framlag. 

„Það kom ekki annað til greina en að segja já þegar Logi leitaði til mín um að leika sig í myndbandinu enda lék Logi mig þegar hann skoraði tvennu í landsleiknum á móti Wales á Laugardalsvellinum um daginn. Svo erum við líka báðir félagar í vinstribakvarðafélaginu, sem er mjög exklúsívur klúbbur þar sem eru innvígðir og innmúraðir auk mín og Loga, Paolo Maldini, Baldur Knútsson, Manuel Amaros, Bjarni Þór Pétursson og Kenny Samson.”

Alvöru menn á sviði 

„Ég er stórhuga og það verða alvöru menn með mér á sviði, tek gömul lög í bland við ný eins og Púllupp, Flametrain og svo munum ég og Patrik taka Skína saman sem hefur bara gerst einu sinni áður,“ segir Logi. Meðal þeirra sem fram koma með Loga eru Herra Hnetusmjör, Króli, Hubba Bubba og Frazier en þá eru ótaldir óvæntir gestir. Logi hlær þegar hann er spurður að því hvernig hann hafi tíma í knattspyrnuna og tónlistarferilinn á sama tíma.

„Ég reyni að hella mér í tónlistina þegar ég kemst til Íslands í frí. Maður passar sig auðvitað að einbeita sér nóg að boltanum og vera fagmaður, ekki láta þetta hafa brjáluð áhrif, maður lætur verkin tala og skorar mörkin í Laugardal,“ segir Logi hress í bragði. Það hafi hjálpað honum að hafa báða fætur á jörðinni að vera í boltanum á sama tíma og hann vinni með sumu af þekktasta tónlistarfólki Norðurlandanna.

„Maður hefur líka verið að gera tónlist hérna úti þegar maður kemst í það, meðal annars með ORIO sem er einn stærsti pródúsent Norðurlandanna. Þetta hefur kannski ekki flogið hátt, enda er maður fyrst og fremst með báða fætur á jörðinni og númer eitt tvö og þrjú núna er að bjóða upp á tónlistarveislu í Gamla bíó í desember.“