Með­ferðar­heimili fyrsta skrefið að þjónustuþorpi fyrir börn

Meðferðarheimilið er fyrir ungmenni á aldrinum þrettán til átján ára sem glíma við hegðunar- og fíknivanda. Vinna við stofnun heimilisins hófst seint á síðasta ári þegar mikil þörf myndaðist fyrir aðgreiningu milli ungmenna eftir að Stuðlar hófu að taka við börnum í afplánun og gæsluvarðhald. Eftir að skelfilegur bruni varð á Stuðlum í október, fækkaði meðferðarplássum á Stuðlum um tvö rými sem voru færð yfir á neyðarvistun Stuðla til bráðabirgða. Ólöf Ásta Farestveit, forstjóri Barna- og fjölskyldustofu, segir að þau hafi þurft að hreyfa sig hratt til að opna Blönduhlíð.

„Það var sett allt trukk á að koma Blönduhlíðinni hér af stað þannig að það voru ráðnir fleiri verktakar og starfsmenn hér inn og svo erum við að reyna að ráða starfsfólk samhliða þessu og áætlum að opna hér bara í desember um leið og við höfum klárað að manna að fullu.“

Áætlað er að börn með þyngri vanda fái áfram greiningu og meðferð á meðferðardeild Stuðla en meðferðarheimilið Blönduhlíð verður opnara úrræði en er á Stuðlum. Foreldrar hafa haft áhyggjur af blöndun ólíkra hópa á Stuðlum.

„Það segir sig sjálft að við setjum ekki þrettán ára barn með hegðunarvanda inn með einhverjum sem eru komnir langt í fíkniefnaneyslu og eru að nálgast átján ára aldurinn þannig að með því að hafa tvö greiningar- og meðferðarheimili þá getum við aðgreint betur og kortlagt svolítið hvaða börn eru að fara hvert,“ segir Ólöf.

Opnun meðferðarheimilisins Blönduhlíðar er aðeins fyrsta skrefið af mörgum því á þessu svæði, sem kallast Farsældartún, á að rísa þjónustuþorp fyrir börn og er heilmikil uppbygging fyrirhuguð á næstu árum. Hugmyndin er að opinberar stofnanir sem fjalla um börn geti verið með aðsetur í Farsældartúni en líka geðlæknar og sálfræðingar. 

Farsældartún er sjálfseignastofnun sem stofnuð var á síðasta ári en hún hefur til umráða sex hektara land. Haraldur L. Haraldsson er stjórnarformaður Farsældartúns.

„Við sjáum fyrir okkur að það verði sameiginlegt mötuneyti og síðan náttúrulega erum við með íþróttaaðstöðu og annað slíkt fyrir börn þannig að það verði mikil samlegðaráhrif af því að vera hérna og síðan erum við komin með mikla þekkingu á sama stað svo fólk þurfi ekki að fara út og suður til þess að sækja aðstoð fyrir börnin sín.“

„Held þetta gæti orðið alveg einstakt“

Ásmundur Einar Daðason, barnamálaráðherra, var viðstaddur opnunina og var glaður með áfangann.

„Það var auðvitað alveg ótrúlega merkilegt að IOGT á Íslandi skyldi ánafna íslenskum börnum þetta svæði hérna á besta stað og síðan er verið að vinna deiliskipulag að þessu og markmiðið er að hér muni geta starfað á breiðum grunni allir þeir sem vinna að málefnum barna og þetta fyrsta skref sem við erum að stíga hérna í dag er liður í því en síðan er í vinnslu að stíga frekari skref en ég held þetta geti orðið algjörlega einstakt og aukið mjög á samtal og samvinnu ólíkra aðila þegar kemur að málefnum barna.“