Rautt spjald eftir þrjá­tíu sekúndur en unnu samt úr­slita­leikinn

Botafogo vann leikinn 3-1 sem var spilaður á Estadio Monumental leikvanginum í Buenos Aires í Argentínu.

Leikmenn Botafogo voru manni færri nær allan leikinn því leikmaður þeirra, Gregore, fékk rauða spjaldið eftir aðeins þrjátíu sekúndur.

Gregore var sendur í sturtu eftir ljótt brot á Fausto Vera en það blæddi úr hausnum á Vera eftir þessa fljúgandi tæklingu Gregore.

Botafogo komst samt í 1-0 á 35. mínútu þegar Luiz Henrique skoraði. Liðið fékk síðan vítaspyrnu sjö mínútum síðar þar sem Alex Telles, fyrrum leikmaður Manchester United, kom þeim í 2-0.

Mineiro minnkaði muninn í upphafi seinni hálfleiks þegar Eduardo Vargas skallaði inn hornspyrnu Hulk. Botofogo stóðs pressuna og Junior Santos innsiglaði sigurinn í uppbótatíma.

Botafogo tryggði sér um leið sæti í Heimsmeistarakeppni félagsliða í sumar.

Brasilíumenn áttu bæði liðin í úrslitaleiknum og hafa nú unnið keppnina sex ár í röð.

Þetta var líka þriðja árið í röð sem bikarinn fer til Rio de Janeiro því Fluminense vann keppnina 2023 og Flamengo vann hana 2022.