Jóla­trjáa­sala til styrktar góðu mál­efni

„BYKO hafði samband við okkur hjá Flugbjörgunarsveitinni Reykjavík og kom með þessa hugmynd. Við höfum margra ára reynslu af því að selja jólatré og töldum rétt að taka þátt í þessu verkefni,“ segir Bergþór Jónsson hjá FBSR. „BYKO sér þá bæði um að skaffa aðstöðu við þessar tvær verslanir og útvegar okkur úrval af fallegum trjám.“

Sala jólatrjáa er ein af þremur grunnstoðum í fjáröflunum FBSR og skiptir sveitina því miklu máli segir Bergþór. „Við vonumst til að þetta samstarf við BYKO renni enn styrkari stoðum undir þessa fjáröflun. Þrátt fyrir að um sjálfboðastarf sé að ræða kostar mikla fjármuni að reka björgunarsveit. Þar má nefna þjálfun björgunarfólks, endurnýjun og rekstur björgunartækja og fleira.“

Salan hefst hjá báðum sveitum í dag, mánudaginn 2. desember, og verða bæði norðmannsþinur og stafafura til sölu.

„Stafafuran kemur í þremur stærðarflokkum, 100-150 cm, 150-200 cm og 200-250 cm. Norðmannsþinurinn kemur hins vegar í fjórum stærðum, 125-150 cm, 150-175 cm, 175-200 cm og 200-250 cm.“

Flugbjörgunarsveitin er auk þess með jólatrjáasölu á Flugvallarvegi í Reykjavík þar sem boðið er upp á meira úrval af íslenskum trjám, m.a. rauð- og blágreni.

Sala jólatrjáa hefst í dag 2. desember og stendur yfir til 23. desember eða á meðan birgðir endast.