Jüle­venner er jólasýning sem fer alltaf úr böndunum

„Eins og venjulega munu frábærir gestir deila sviðinu með mér,“ segir Gauti. „Þessi jólin verður þetta algjört stjörnulið en þá mæta Patr!k, Steindi Jr., GDRN, Úlfur Úlfur og sjálf Brigitta Haukdal en ég er búinn að reyna að fá hana í mörg ár. Svo verða auðvitað skemmtilegir leynigestir eins og alltaf.“

Gauti hvetur gesti til að mæta tímanlega. „Við munum bjóða upp á lítið Jülevenner jólaþorp í anddyrinu þar sem hægt er að kaupa mat og drykki og njóta allskonar afþreyingar. Þannig að það er um að gera að lengja í upplifuninni og mæta fyrr í hús.“

Sá ekki fyrir þennan mikla vöxt

Jülevenner Emmsjé Gauta hefur vaxið jafnt og þétt á undanförnum árum. „Þegar ég skipulagði fyrstu sýninguna í Gamla bíói á sínum tíma var ég ekki með neitt plan í gangi annað en að halda eina sýningu. Eftirspurnin varð slík að ég hélt sjö sýningar þau jólin. Næstu árin var ég í Háskólabíó og sýningin stækkaði með hverju árinu. Nú er ég komin í gamla hverfið mitt Breiðholt í fyrsta sinn í enn stærra og betra húsnæði sem er bara rökrétt framhald á sjóvinu,“ segir Gauti en sýningarnar verða í ÍR heimilinu í Seljahverfinu þar sem hann ólst upp.

Framboð af jólatónleikum og alls kyns viðburðum fyrir jólin hefur aukist mikið síðustu árin en Gauti vill samt ekki kalla sýninguna sína hefðbundna jólatónleika. „Ég lít fyrst og fremst á sýningu okkar sem skemmtilega upplifun fyrir gesti okkar, frekar en vel æfða jólatónleika. Enda hef ég undanfarin ár boðið upp á gesti á borð við Sögu Garðars, Tvíhöfða, ballett, Pétur Jóhann og danshópa. Þetta er sýningar fullar af frumlegheitum, húmor og óvæntum atriðum enda leggjum við mikla vinnu í að skipulagninguna og reynum alltaf að toppa okkur hvert ár.“

Áhorfendur verða að fá alvöru skemmtun

Hann segir engan á þessum jólaviðburðarmarkaði vera að vinna með sömu hugmyndir og hann. „Það þarf alltaf eitthvað extra. Ég fæ bæði sjálfur alls konar hugmyndir en fæ svo líka aðrar hugmyndir frá öðrum tónleikum og blanda þessu öllu saman í frábæra upplifun. Við erum heldur ekkert að drukkna í jólalögum, ég held að ég hafi mest boðið upp á þrjú jólalög eitt árið. Svo fara þessar sýningar alltaf úr böndunum enda spörum við aldrei gæðin og grínið. Áhorfendur verða að fá alvöru skemmtun fyrir þennan pening.“

Fimm sýningar eru í boði í ár dagana 20.-21. desember, þar af ein sérstök fjölskyldusýning 21. desember kl. 15. „Sú sýning er um klukkutími og inniheldur sömu gestina. Auðvitað tónum við húmorinn aðeins niður, miðað við hinar sýningarnar sem eru stílaðar inn á fullorðið fólk, þannig að þetta á eftir að vera stórskemmtileg fjölskyldustund.“

Óvenjuleg og skemmtileg auglýsingaherferð

Auglýsingin fyrir Jülevenner hefur vakið mikla kátínu en hún var unnin í samstarfi við Netgíró og sýnir tölvugerða útgáfu af Gauta. „Ég persónulega trúi ekki á „plakata-spons“. Samstarf listamanns og fyrirtækja verður að vera skemmtilegt og gagnlegt fyrir báða aðila. Netgíró hefur áður verið í skemmtilegum markaðsherferðum, t.d. með Blush, og ég vissi að þetta var fyrirtæki sem væri til í að leika sér aðeins með smá húmor.“

Það var fyrirtækið Maurar sem vann auglýsinguna þar sem Gauti var m.a. settur í þrívíddarskanna til að ná réttum hlutföllum. „Við fórum „all in“ fyrir þessar fáu sekúndur en kjarni auglýsingarinnar snýst um að fyrir flest fólk er bara nóg í gangi í desember svo því ekki að bara að hafa gaman í desember og borga miðann á Jülevenner í febrúar? Bara svona eins og að nota kreditkort með góðum greiðslufresti.“

Undirbúningsferlið er lang fyrir svona jólatörn og hafa síðustu vikur verið annasamar hjá Gauta. Hvað ætlar hann að gera á sunnudaginn þegar þessi vertíð er búin? „Það er ekkert annað í stöðunni en að njóta þess að vera með fjölskyldunni og eiga gott frí. Þetta er í fyrsta skiptið í átta ár, fyrir utan eitt Covid árið, sem ég er í fríi á Þorláksmessu. Kannski skelli ég mér á tónleika með Bubba.“

Jülevenner Emmsjé Gauta er í samstarfi við Tuborg Julebrygg, Aur & Netgíró, Nettó og Prikið.

Hægt er að kaupa miða á Tix. Ath. kvöldsýningin er ekki ætluð börnum og aldurstakmark 18 ár.