Greint var frá ákvörðun um útboðið í fréttum Stöðvar 2. Auglýstur verður liðlega sjö kílómetra kafli sem liggur úr Dynjandisvogi og upp á háheiðina. Ennfremur eins kílómetra afleggjari að fossinum Dynjanda.
Þetta verk varð eitt af fórnarlömbum útboðsstopps allra stærri verka hjá Vegagerðinni, sem meira og minna hefur staðið yfir í fimmtán mánuði. Hvorki Vegagerðin né innviðaráðuneytið hafa útskýrt þetta útboðshlé.
Úr röðum stjórnarþingmanna á nýliðnu kjörtímabili hefur það þó einkum verið skýrt með því að mæta hafi þurft stórfelldum umframútgjöldum til Hornafjarðarfljóts sem Vegagerðin stofnaði til án fjárheimilda. Í pistli á facebook fyrir tveimur vikum sagði Jón Gunnarsson, fráfarandi þingmaður Sjálfstæðisflokks, þetta afleiðingu þess að Sigurður Ingi Jóhannsson, innviðaráðherra og fjármálaráðherra, hefði sólundað fé og forgangsraðað verkefnum án heimilda Alþingis.
Í frétt Vísis og Stöðvar 2 síðastliðið sumar kom fram að útgjöld án fjárheimildar vegna Hornafjarðarfljóts stefndu í 6,5 milljarða króna. Til að mæta þeirri framúrkeyrslu hafi fimm öðrum stórverkefnum verið frestað; Fossvogsbrú, breikkun Vesturlandsvegar um Kjalarnes, brúasmíði í Gufudalssveit, Dynjandisheiði og Brekknaheiði á Langanesi.
Núna er stefnt á að tilboð í þennan þriðja áfanga vegagerðar um Dynjandisheiði verði opnuð þann 28. janúar, að sögn Sólveigar Gísladóttur, upplýsingafulltrúa Vegagerðarinnar. Gert er ráð fyrir verklokum 30. september 2026. Verktími er samkvæmt því áætlaður um eitt og hálft ár.
Hér má sjá frétt Stöðvar 2:
Hér má sjá hvaða veglína var valin um friðland fossins Dynjanda:
