Fjölgar lista­verkum eftir konur á Bessa­stöðum

Í tilkynningu frá embættinu segir að allt frá lýðveldisstofnun hafi Listasafn Íslands lánað listaverk til Bessastaða. Almenningi býðst næst að heimsækja Bessastaði á Safnanótt sem haldin verður í tilefni Vetrarhátíðar þann 7. febrúar næstkomandi. Nánar má fræðast um myndlistina á þjóðhöfðingjasetrinu hér. 

Samtals 28 íslensk verk úr safnkosti Listasafns Íslands prýða nú Bessastaði að loknum breytingum auk nokkurra verka sem eru í eigu embættisins. Samhliða endurnýjuninni verður sett upp ný síða á vef Listasafns Íslands sem tileinkuð er listaverkunum á Bessastöðum. Markmiðið er samkvæmt tilkynningu að þjóðhöfðingjasetrið endurspegli þá miklu grósku sem einkennir íslensk myndlistarlíf og jafnframt að greiða aðgengi almennings að upplýsingum um listaverkin sem þar má sjá.

Listaverkin

Samkvæmt tilkynningu er nú í móttökusal Bessastaða er listaverk eftir Nínu Tryggvadóttur í öndvegi en Flugþrá Jóhannesar Kjarvals, sem þar var áður, fær enn að njóta sín í salnum, að viðbættu verki hans Blóm í landslagi. Þá er verkið Vindstroka eftir Kjarval á sama stað og áður í bókhlöðunni. Önnur ný verk í móttökusalnum eru eftir Kristínu Jónsdóttur, Júlíönu Sveinsdóttur, Jón Stefánsson, Kristján Davíðsson, Georg Guðna Hauksson og Eggert Pétursson. Öll eiga þau það sameiginlegt að leita innblásturs í íslenskri náttúru þótt hvert og eitt þeirra geri það með sínum sérstaka hætti.

Í Suðurstofu Bessastaða eru verk eftir listafólk sem öll hafa unnið með myndheim abstrakt listar og spanna þau tæplega 100 ára tímabil. Hið elsta er eftir Finn Jónsson sem var frumkvöðull í abstraktlist á Íslandi. Meðal verka á fyrstu sýningu hans, árið 1925, var verkið Óður til mánans sem nú má sjá á Bessastöðum. Yngsta verkið í Suðurstofu er Sveigja frá árinu 2023 eftir Kristínu Morthens sem er fædd árið 1992. Þá eru í Suðurstofu verk eftir Svavar Guðnason, Nínu Tryggvadóttur, Guðmundu Andrésdóttur og Kristján Davíðsson.

Borðstofa Bessastaða er helguð úrvali verka sem innblásin eru af íslenskum atvinnuháttum. Í verkum eftir Kristínu Jónsdóttur, Þorvald Skúlason og Jón Engilberts má sjá fólk við ýmis störf sem tengjast þéttbýlismenningu. Sveitarómantíkin svífur hins vegar yfir vötnum í verkum Louisu Matthíasdóttur og Jóhanns Briem sem einnig prýða borðstofuna.

Í Thomsenstofu voru valin verk eftir þrjá frumherja íslenskrar myndlistar, þá Þórarin B. Þorláksson, Ásgrím Jónsson og Jóhannes Kjarval. Þar má einnig sjá verk í eigu forsetaembættisins eftir danska listamanninn Emanuel Larsen sem var málað árið 1847.

Á Thomsengangi hangir nú vefnaðarverk sem Volodimír Selenskí Úkraínuforseti færði forseta Íslands að gjöf eftir fund þeirra á Bessastöðum í október 2024. Verkið, sem kallast Sólblóm eftir þjóðarblómi Úkraínu, er handofið veggteppi eftir úkraínskar listakonur frá bænum Reshetylivka í Poltava-héraði sem þekkt er fyrir einstakt handverk. Í sama rými eru tvö blómamálverk eftir þær Júlíönu Sveinsdóttur og Nínu Sæmundsen sem valin voru sérstaklega til að kallast á við veggteppið.

Loks ber að nefna höggmyndina Móðir og barn eftir Tove Ólafsson en það verk blasir við gestum Bessastaða þegar gengið er um blómaskálann inn í móttökusal.