„Ég fæ ekki séð hvaða rugl þetta er“

Í júlí lagði ríkissaksóknari til við dómsmálaráðherra að Helgi Magnús Gunnarsson yrði leystur frá störfum vegna ummæla sem hann hafði látið falla um innflytjendur. Þá sagði hún að háttsemi hans næði aftur til ársins 2017, og sneri að nokkrum tilvikum um óæskilega tjáningu hans.

Sjá: Háttsemi Helga nái aftur til 2017

Dómsmálaráðherra hafnaði beiðni ríkissaksóknara 9. september síðast liðinn. Ummælin voru talin óviðeigandi og til þess fallin að grafa undan trúverðugleika ákæruvaldsins, en sérstakar aðstæður hafi réttlætt þau. Helgi og fjölskylda hans hafði sætt þrálátum hótunum af hálfu Mohamad Kourani undanfarin ár.

Helgi Magnús hefur verið í veikindaleyfi undanfarnar vikur en til stóð að hann hæfi störf að nýju fyrir helgi. Ríkissaksóknari vill enn meina að hans vinnuframlags sé ekki óskað, en hún hefur ekki falið honum nein verkefni og hann kemst ekki í tölvukerfi embættisins.

Skilur ekki nokkurn skapaðan hlut í þessu

„Ég fæ ekki séð hvaða rugl þetta er. Ég sé ekki að það sé nein lagaleg forsenda fyrir þessari ákvörðun hennar. Ég er í starfi skipaður af ráðherra og það er ekki hennar að ákveða neitt um það,“ segir Helgi.

Hann segir að ráðherra hafi þegar tekið til umfjöllunar öll þau sjónarmið um óviðeigandi tjáningu sem Sigríður byggir ákvörðun sína á. Málið sé eiginlega orðið að einelti.

„Ef hún virðir það ekki er það bara hennar vandamál.“

Helgi kveðst ekki vita hvað gerist í framhaldinu, en gerir ráð fyrir að ákvörðunin verði kærð til nýs ráðherra dómsmála.

Málið farið að lykta ómálefnalega

„Þetta er náttúrulega almannafé sem borgar mér laun, og að menn telji sig geta farið svona með almannafé, þetta er svolítið farið að lykta af einhverri ómálefnalegri illsku. Af hverju ekki bara að una niðurstöðu ráðherra sem var löglega fengin?“

Ákvörðun ráðherra væri lögbundin og bindandi. 

„Ákvörðun ráðherra, sem brást við ósk ríkissaksóknara um að leysa mig frá störfum, er búin að liggja fyrir frá 9. september síðast liðnum. Hún hafnaði kröfu ríkissaksóknara, að fengnum tveimur lögfræðiálitum sem hún aflaði, og þeirri ákvörðun á ríkissaksóknari að hlíta. Ákvörðunin er endanleg. Niðurstaða í máli þessu ræðst af lögum, nýr ráðherra getur ekki tekið aðra ákvörðun í málinu enda ekkert nýtt komið fram og ekkert sem breytir fyrri niðurstöðu.“

„Það hefur enginn getað útskýrt fyrir mér hverslags málsmeðferð þetta er, annað en einhver geðþótti. Ég velti því fyrir mér núna hvað í ósköpunum ég á að gera í þessari stöðu, á ég bara að sitja heima? Það á eftir að koma í ljós hvernig ég bregst við þessu en ég læt ekki hrekja mig úr starfi né mun ég lúffa fyrir þessu.“